Suriya ordusu bildirib ki, islamçıların rəhbərlik etdiyi üsyançıların Həma şəhərinə daxil olmasından sonra “mülki əhalinin həyatını qorumaq və şəhər döyüşlərinin qarşısını almaq üçün” qoşunları yenidən yerləşdirir, bu isə ölkə prezidenti Bəşar Əsəd, habelə onun İran və Rusiyadakı müttəfiqləri üçün növbəti itkidir.

“Son bir neçə saat ərzində əsgərlərimizlə terrorçu qruplar arasında qarşıdurmaların güclənməsi ilə... bu qruplar şəhərdə bir sıra maneələri yara bilib və ora daxil olublar”, dekabrın 5-də Suriya Ordusunun bəyanatında deyilir.

Suriyanın dördüncü ən böyük şəhəri olan Həma Dəməşqin müdafiəsi üçün açardır və strateji olaraq Rusiya hərbi dəniz bazasına ev sahibliyi edən sahilyanı Tartus və Latakiya şəhərlərinə açılan qapıdır.

Suriya və Rusiya qüvvələri bir gün əvvəl üsyançıları atəşə tutub və onların irəliləyişini dayandırmaq üçün havadan zərbələr endirib.

"Bununla (Həmada irəliləyiş) Əsəd əsl problemlə üzləşib. Növbəti Homsdur və onun kəndləri müxalifətin irəliləyişini asanlaşdırmaq üçün daha əlverişlidir", Suriya və Terrorizm və Ekstremizmlə Mübarizə Proqramlarının Direktoru Çarlz Lister X-də yazıb.

İslamçı Heyət Təhrir əl-Şam (HTS) qruplaşmasının başçılıq etdiyi üsyançılar son bir neçə gündə ölkənin ən böyük şəhəri olan Hələbin, eləcə də 14 mərkəzi kənd və qəsəbənin ələ keçirilməsi də daxil olmaqla, böyük irəliləyişlər əldə edib və Rusiyanın idarə etdiyi Xmeymim aviabazasına bir qədər yaxınlaşıblar.

Suriya 2015-ci ildə Moskvanın Dəməşqə dörd ildir davam edən vətəndaş müharibəsinin gedişatını öz xeyrinə çevirmək üçün daxil olduqdan sonra hava bazasını Rusiyaya təhvil verib.

Üsyançılar arasında HTS ilə yanaşı, Türkiyənin dəstəklədiyi Suriya qüvvələrindən ibarət Suriya Milli Ordusu adlı qruplaşma da var.

Birləşmiş Millətlər Təşkilatı on minlərlə dinc sakinin döyüşlər nəticəsində evlərini tərk etdiyini bildirib.