Prezident Donald Tramp bazar ertəsi fərman verib və bəyan edib ki, bu, “Birləşmiş Ştatların kağız çubuqların istifadəsinə son qoymaq siyasətidir”.

Keçmiş prezident Co Bayden administrasiyası federal birdəfəlik plastik satınalmalarını mərhələli şəkildə dayandırmaq cəhdi ilə 2024-cü ilin iyul ayında plastikləri təkrar istifadə edilə, kompostlana və yüksək dərəcədə təkrar emal edilə bilən məhsullarla əvəz etmək planını açıqlamışdı.

Trampın bazar ertəsi verdiyi əmrdə kağız çubuqların işlək olmadığı, insan sağlamlığı üçün risk daşıyan kimyəvi maddələrdən istifadə edildiyi, istehsalı plastik çubuqlardan daha baha başa gəldiyi və tez-tez istifadəçiləri birdən çox kağız çubuqlardan istifadə etməyə məcbur etdiyi bildirilib.

O, qeyd edib ki, kağız çubuqlar çox vaxt fərdi şəkildə plastikə bükülür və bu, onların istifadəsi üçün ekoloji arqumenti sarsıdır.

“Bu, gülünc vəziyyətdir. Biz plastik çubuqlara qayıdırıq”, Tramp bazar ertəsi sərəncamı imzalayarkən deyib.

Bayden siyasəti 2027-ci ilə qədər federal qida xidməti əməliyyatlarından, tədbirlərdən, qablaşdırmadan və 2035-ci ilə qədər bütün federal əməliyyatlardan plastik çubuqları və digər birdəfəlik plastikləri çıxarmağı hədəfləyirdi.

Tramp həftə sonu sosial şəbəkələrdəki paylaşımında prezident Co Baydenin siyasətini “ÖLÜ!” elan edib.

Bazar ertəsi verdiyi əmrdə o, agentlik rəsmilərinə kağız çubuqları almağı dayandırmağı və agentlik binalarında onların artıq verilməməsindən əmin olmağı tapşırıb.

O, həmçinin rəsmilərə 45 gün ərzində kağız çubuqların istifadəsinə son qoymaq üçün milli strategiya yaratmağa göstəriş verib.