Son zamanlar Ukrayna münaqişəsinin dayandırılması ilə bağlı aparılan danışıqlar fonunda Qərb ölkələrinin bəzi məşhur brendləri yenidən Rusiya bazarına qayıtmağı planlaşdırır.
İqtisadiyyat.az xəbər verir ki, bu barədə "aif.ru" portalı məlumat yayıb.

Kremlin rəsmi nümayəndəsi Dmitri Peskov bildirib ki, xarici şirkətlər geri qayıdaraq yerli istehsalçılarla rəqabət aparmaq istəyirlərsə, bunun istehlakçılar üçün faydalı olacağını düşünür. Lakin hələlik belə bir rəsmi müraciət daxil olmayıb.

Məlumata görə, "McDonald's", "Coca-Cola", "Apple", "Visa", "IKEA", "Toyota" və digər böyük markalar Rusiyaya qayıtmaq üçün ilkin addımlar atıblar. "McDonald's", əgər ABŞ hökumətindən müvafiq icazə alarsa, bir neçə ay ərzində yenidən fəaliyyətə başlaya bilər. Əgər geri qayıtsa, əvvəlki adını qaytarmaq və ya "Vkusno i toçka" adı ilə işləmək variantı mövcuddur.

"IKEA" üçün geri qayıdış daha çətin ola bilər, çünki yerli mebel istehsalçıları artıq bazarda mövqelərini gücləndiriblər. Şirkət yenidən təchizat zəncirini qurmaq üçün ciddi investisiya tələb edəcək. Bununla belə, Rusiya bazarının böyüklüyü şirkəti geri qayıtmağa sövq edə bilər.

"Zara", "Bershka", "Pull&Bear" və "Stradivarius" kimi brendlər də sanksiyalar götürüldükdən sonra qayıda bilər. Geri dönüş prosesi 1-2 il çəkə bilər, lakin siyasi maneələr qalarsa, bu müddət 5 ilə qədər uzana bilər.

"Hyundai" və "Kia" Rusiya bazarına yenidən daxil olmaq istəsə də, artıq Çin avtomobil markaları burada möhkəmlənib. Onların əvvəlki mövqelərini geri qaytarması çətin olacaq. "Toyota" isə hələ də rusiyalı dilerlərlə əlaqələrini qoruyur və geri qayıtmaq variantlarını nəzərdən keçirir.

Analitiklərə görə, 2025-ci ilə qədər 2022-ci ildə Rusiyanı tərk etmiş 350-yə yaxın xarici şirkətin geri qayıtması mümkündür. Bunun üçün əsas şərt siyasi münasibətlərin yumşalması və sanksiyaların qismən və ya tamamilə ləğv olunmasıdır.