Meksika hakimiyyəti "Google" şirkətinin "Amerika Körfəzi" adından istifadəyə davam etməsi halında məhkəməyə müraciət edəcək.
"RIA Novosti" xəbər verir ki, bu barədə ölkə prezidenti Klaudiya Şeinbaum bildirib.

O vurğulayıb ki, ABŞ öz kontinental şelfi ilə bağlı fərman qəbul edib, lakin Google-un Meksika və Kuba üçün toponimləri dəyişdirmək hüququ yoxdur.

Fevralın 11-də "Google" rəsmi olaraq "Meksika Körfəzi"nin adını dəyişdirərək "Amerika Körfəzi" adlandırmağa başladığını və ABŞ-dəki istifadəçilərin artıq bu yeniliyi görə biləcəyini açıqlamışdı.

Daha sonra "Apple" da Google-un ardınca öz xəritələrində "Meksika Körfəzi"nin adını "Amerika Körfəzi" olaraq dəyişdirib.