Fransanın şərqində şənbə günü nümayiş zamanı baş verən bıçaqlı hücumda bir nəfər ölüb, iki polis əməkdaşı ağır yaralanıb. Bu barədə yerli prokuror məlumat verib.

Prokuror Nikolas Heitz AFP-yə bildirib ki, Mulus şəhərində terrorun qarşısının alınması üzrə nəzarət siyahısında olan 37 yaşlı şübhəli şəxs tərəfindən həyata keçirilən hücumda daha üç zabit yüngül xəsarət alıb.

FSPRT adlanan siyahı "terrorçu" radikallaşmanın qarşısını almaq məqsədi ilə insanlar haqqında müxtəlif orqanlardan məlumat toplayır. O, 2015-ci ildə Charlie Hebdo satirik jurnalının ofislərinə və yəhudi supermarketinə edilən ölümcül hücumlardan sonra istifadəyə verilib.

Fransanın milli antiterror prokurorluğunun PNAT bölməsinin verdiyi açıqlamada, şübhəlinin şənbə günü günortadan sonra Mulus şəhərində "Allahu Əkbər" ("Allah ən böyükdür") qışqıraraq yerli polis əməkdaşlarına hücum etdiyini bildirib.

Prokurorluğun məlumatına görə, hadisəyə müdaxilə edərək polisə kömək etmək istəyən yoldan keçən bir şəxs həlak olub.

Heitz bildirib ki, ağır yaralanan polis məmurlarından biri yuxu arteriyasından, digəri isə döş qəfəsindən xəsarət alıb.

Daxili işlər naziri Bruno Retallonun şənbə günü hücum yerinə getməsi gözlənilirdi.

Yerli vaxtla saat 16:00-a yaxın, Konqoya dəstək nümayişi zamanı baş verən hücumdan sonra polis təhlükəsizlik parametri təyin edib.

Həmkarlar ittifaqı mənbələrinin bildirdiyinə görə, Əlcəzairdə anadan olan şübhəli məhkəmə nəzarəti altında və ev dustaqlığında olub, və onunla bağlı Fransadan qovulma əmri verilib.

Mulusun meri Mişel Lutz Facebook-da "Şəhərimizi dəhşət bürüdü" deyib. O, hadisənin terror hücumu kimi araşdırıldığını, lakin "əlbəttə ki, bu, hələ də məhkəmə orqanları tərəfindən təsdiqlənməlidir" deyib.

Fransanın antiterror prokurorluğunun işi araşdırdığını təsdiqlədikdən sonra Fransa prezidenti Emmanuel Makron şənbə günü ölümcül bıçaqlı hücumun "islamçı terrorizm" olduğunu söyləyib.

"Bu, şübhəsiz ki, islamçı terror aktıdır," deyə, Fransanın illik kənd təsərrüfatı şousunda iştirak edən Makron jurnalistlərə deyib və daxili işlər nazirinin Mulusa yollandığını əlavə edib.

Prokurorluqdan bildirilib ki, şübhəli şəxs həbs edilib