Prezident Donald Tramp bazar günü sosial şəbəkədəki paylaşımında bildirib ki, mühafizəkar tok-şou aparıcısı Dan Boncino FTB-nin direktor müavini olacaq.

Boncino bu yaxınlarda Senat tərəfindən FTB-nin direktoru vəzifəsinə təsdiq edilmiş Kaş Patelə qoşulacaq. Tramp bildirib ki, Boncinonu bu vəzifəyə Patel namizəd göstərib. Bu vəzifəyə namizədi Senatın təsdiq etməsi tələb olunmur.

"Hüquq-mühafizə orqanları və Amerika ədaləti üçün əla xəbər!" Tramp özünün “Truth Social” sosial şəbəkəsində yazıb, Boncinonu “Ölkəmizə inanılmaz sevgi və qayğısı olan insan” adlandırıb.

Boncino əvvəllər Nyu-York polisi və ABŞ Məxfi Xidmətinin üzvü olub. O, son vaxtlar mühafizəkar radio aparıcısı və podkastçı kimi tanınırdı.

Tramp öz paylaşımında bildirib ki, Boncino yeni vəzifəyə qədəm qoyan kimi proqramından “ imtina etməyə hazırdır”. Spotify-ın məlumatlarına görə, "The Dan Bongino Show" ən son göstəricilərə görə ABŞ-dakı podkastlar arasında 56-cı sırada idi.