Almaniyanın ehtimal olunan növbəti kansleri Fridrix Merts, mühafizəkar bloku ifrat sağ və solçu partiyaların narazı seçicilərin dəstəyini qazandığı ümumilli seçkilərdə qalib gəldikdən sonra, bazar ertəsi günü koalisiya hökuməti qurmağa çalışacaq.

Kanslerlik təcrübəsi olmayan Merts Avropanın ən böyük iqtisadiyyatında geriləmə baş verdiyi, cəmiyyətinin miqrasiyaya görə bölündüyü bir vaxtda idarəçiliyə başlamağa hazırlaşır.

Kansler Olaf Şoltsun üçtərəfli koalisiyasının dağılmasından sonra səsvermədə ifrat sağçı Almaniya üçün Alternativ (AfD) partiyasının tarixi nəticəyə nail olaraq ikinci yerə yüksəlməsindən sonra 69 yaşlı siyasətçi uzun koalisiya danışıqları ilə üzləşir.

Siyasi niyyətlərinin ilkin göstəricisi olaraq, Merts qalibiyyətindən sonra ABŞ-ı da hədəfə alıb, kampaniya zamanı Vaşinqtondan gələn "son dərəcə ağlasığmaz" şərhləri tənqid edərək, onları Rusiyanın bədniyyətli müdaxilələri ilə müqayisə edib.

"Mənim üçün mütləq prioritet Avropanı mümkün qədər tez gücləndirmək olacaq. Belə olarsa, biz addım-addım ABŞ-dan real müstəqilliyə nail ola bilək", Merts bazar günü deyib.

İlkin nəticələrə görə, onun mühafizəkar CDU/CSU bloku 28,6% səslə birinci yeri tutub, ifrat sağçı Almaniya üçün Alternativ partiyası isə 20,8% səslər ikinci yerdə gəlib.

Bununla belə, meynstrim partiyalar ekstremizmdə şübhəli bilinərək Almaniya təhlükəsizlik xidmətləri tərəfindən nəzarət edilən, lakin milyarder Elon Musk da daxil olmaqla ABŞ fiqurları tərəfindən dəstəklənən AfD ilə işləməyi istisna edir.

Bu isə o deməkdir ki, Merts koalisiya yaratmaq üçün Şoltsun mərkəz sol Sosial Demokratlar partiyası(SPD) ilə danışıqlar aparmalı olacaq. Bu danışıqların, iki partiya arasında siyasət fərqlərini vurğulayan seçki kampaniyasından sonra, aylar çəkəcəyi gözlənilir.