Cənubi Koreya Prezidenti Yun Suk Yeol şənbə günü təcridxanadan sərbəst buraxılıb. Belə ki, ittihamçılar impiç edilən liderin qiyam ittihamı ilə həbsinə dair qərarını ləğv etməklə bağlı məhkəmə qərarından apellyasiya şikayəti verməməyə qərar veriblər.

Yun vəzifəsindən kənarlaşdırılıb və onun dekabrın 3-də qısamüddətli hərbi vəziyyət elan etməsi ilə əlaqədar cinayət işi və impiçmentinə dair məhkəmə işi davam edir.

Seulun Mərkəzi Rayon Məhkəməsi ittiham aktının zamanlaması və istintaq prosesinin "qanuniliyi ilə bağlı suallar"ı əsas gətirərək, cümə günü Yunun həbs orderini ləğv edib.

“Birinci, mən Mərkəzi Rayon Məhkəməsinə cəsarətləri və qanunsuzluğu düzəltməkdəki qətiyyətlərinə görə təşəkkür etmək istəyirəm,” Yun açıqlamasında bildirib.

Vəkilləri deyib ki, məhkəmə qərarı “prezidentin həbsinin həm prosessual, həm də maddi baxımdan problemli” olduğunu göstərdi. Onlar qərarı “qanunun aliliyini bərpa etmək yolunun başlanğıcı” adlandırıb.

İttihamçılardan dərhal şərh almaq mümkün olmayıb.

Yunun impiçment işində Konstitusiya Məhkəməsinin növbəti günlərdə onu vəzifəsinə bərpa edilməsi, yoxsa uzaqlaşdırılmasına dair qərar verəcəyi gözlənilir.

Vəzifədə ikən həbs olunan ilk Cənubi Koreya prezidenti olan Yun yanvarın 15-dən bəri həbsdə idi.

Yonhap xəbər agentliyi polisin verdiyi qeyri-rəsmi rəqəmlərə əsaslanaraq bildirib ki, şənbə günü Yunun təxminən 38 min tərəfdarı Seulda aksiya keçirib, 1500 nəfər isə ona qarşı nümayiş keçirib.