Karib hövzəsindəki Haiti dövlətinin Mirebalais bölgəsində yerləşən həbsxanaya silahlı dəstə hücum edib. Hadisə nəticəsində 530 məhbus həbsxanadan qaçıb.

Teleqraf xəbər verir ki, bu barədə yerli xəbər saytı "Vant Bef Info" məlumat yayıb.

Bölgədəki məktəblərdə təhsil müvəqqəti olaraq dayandırılıb.

Hücumdan sonra silahlı dəstə üzvləri ərazidəki binalara və yoldan keçənlərə atəş açıb, bir çox maşını yandırıblar.

Haiti İnsan Haqları Hüquqşünasları Kollektivinin baş koordinatoru Arnel Remi hücum nəticəsində həbsxanadan 530 məhbusun qaçdığını açıqlayıb. BBC-nin verdiyi məlumata görə, bəzi qaçan məhbuslar hələ də Mirebalais küçələrində dolaşırlar.

Beynəlxalq Böhran Qrupunun analitiki Dieqo Da Rin hücumun əvvəlki hadisələrdən daha şiddətli olduğunu vurğulayıb və silahlı dəstələrin gücünü paytaxtdan kənara da yaymağa başladığını qeyd edib. Rin təhlükəsizlik qüvvələrinin bu hücumlara cavab verməkdə çətinlik çəkdiyini bildirib.

Qeyd edək ki, Hait illərdir davam edən siyasi, iqtisadi və təhlükəsizlik böhranları ilə üzləşir. BMT-nin məlumatına görə, 2024-cü ildə silahlı dəstə hücumları nəticəsində 5600-dən çox insan həyatını itirib. Ölkədəki zorakılıqların artması, keçmiş baş nazir Ariel Henri'nin istefasına və yeni rəhbərliyin təyin olunmasına səbəb olub.