Gürcü könüllülər hazırda Ukraynada, Ukrayna Silahlı Qüvvələrinin tərkibində döyüşürlər.

TASS xəbər verir ki, Qafqaz Beynəlxalq Universitetinin professoru və tanınmış ekspert Piter Mamradze onların vaxtilə Gürcüstanın keçmiş prezidenti Mixail Saakaşvili tərəfindən cəlb olunduğunu bildirib.

“Saakaşvili Gürcüstandan qaçdı və yaxın çevrəsini də özü ilə birlikdə Ukraynaya apardı. Gürcüstan hökuməti onları geri qaytarmaq üçün dəfələrlə müraciət etsə də, nə vaxtilə Ukraynanın prezidenti olmuş Poroşenko, nə də indiki prezident Zelenski onları bizə təhvil vermədi. Əksinə, bu şəxsləri yüksək vəzifələrə təyin etdilər.

Daha sonra Saakaşvili Ukraynadan Gürcüstan ordusuna səslənərək, hərbçiləri xidmətdən ayrılıb Ukraynaya gəlməyə və burada yüksək maaşla ordu sıralarına qoşulmağa çağırdı. O, açıq şəkildə onları işə qəbul etməyə başladı. Bu gün gördüklərimiz, həmin dövrün nəticəsidir”, – deyə Mamradze bildirib.

Mamradze qeyd edib ki, Gürcüstan qanunlarına görə, başqa ölkədə könüllü olaraq müharibəyə qatılmaq cinayət sayılmır. Qanun yalnız terror təşkilatlarına qoşulmağı və onlarda iştirakı cinayət hesab edir.

Rusiya İstintaq Komitəsinin sədri Aleksandr Bastrıkin isə daha əvvəl açıqlamışdı ki, Ukrayna tərəfində döyüşən ən çox sayda xarici vətəndaşlar Gürcüstan, Böyük Britaniya, ABŞ və Kanadadandır. Onun sözlərinə görə, hazırda Ukraynada Gürcüstandan 712 nəfər vuruşur.