Əfqanıstanın paytaxtı Kabildə iki partlayış olub.

Axar.az xəbər verir ki, “Röyter” agentliyi partlayışlardan birinin Əfqanıstan Milli Təhlükəsizlik Xidmətinin binası yaxınlığında baş verdiyini yazıb. Partlayış nəticəsində 7 nəfər həlak olub, 20 nəfər yaralanıb.

Əfqanıstan polisi partlayışı kamikadzenin törətdiyini bildirib.

***

Rəsmi məlumata görə, ölənlərin sayının 21-ə çatıb, 27 nəfər isə yaralanıb.

Ölənlər arasında "Frans Press" agentliyinin fotoqrafı Şa Marai də var.

***

Əfqanıstanın cənub-şərqində yerləşən Host vilayətində BBC-nin jurnalisti Əhməd Şah öldürülüb.

Host vilayətinin polis rəisinin məlumatına görə, velosipedlə hərəkət edən Əhməd Şah naməlum silahlı şəxslər tərəfindən atəşə tutulub. Ağır xəsarətlər alan jurnalist xəstəxanaya çatdırılsa da, onun həyatını xilas etmək mümkün olmayıb.