Bu gün Suraxanı Rayon İcra Hakimiyyəti tərəfindən şəhid Əliyev Samirin adına parkın və inşa edilmiş bulağın açılış mərasimi baş tutub.

Yenicag.az xəbər verir ki, rayon icra başçısı Əziz Əzizovun da qatıldığı mərasimdə şəhidimizin ruhuna və onun anasına qarşı hörmətsizlik edilib.

Belə ki, təşkilatçılar tərəfindən “kreativlik” edilərək üzərində şəhidin şəklinin olduğu tort hazırlanıb. Daha sonra şəhid anasının yanında oğlunun şəkli olan tort kəsilib.

Şəkildən də göründüyü kimi həmin anlar şəhid anasına çox pis təsir edib, o, göz yaşlarına hakim ola bilməyib.

Dəhşətlisi isə budur ki, şəhidimizin anasının duyğularını heçə sayan, onun ruhuna hörmətsizlik etməkdən çəkinməyən Əziz Əzizovun kadrları tərəfindən həmin şəkillər Suraxanı RİH-in “Facebook” hesabından paylaşılıb.