“KTMT Ermənistanın siyasi vasitələrlə vəziyyəti həll etmək üçün atdığı addımları dəstəkləyir”. Bunu KTMT-nin baş katibi Stanislav Zas İrəvana işgüzar səfərindən əvvəl Armenpress-ə müsahibəsində bildirib.

O, həmçinin bildirib ki, KTMT Ermənistan və Azərbaycanın sərhəddə demarkasiyaya başlamaq qərarını mövcud vəziyyətin təkrarlanmaması üçün mühüm addım kimi qiymətləndirir.

“Biz Ermənistan-Azərbaycan sərhədində yaranmış gərgin vəziyyətdən narahatıq, onu diqqətlə izləyirik. Biz hesab edirik ki, sərhəd mübahisələri yalnız siyasi və diplomatik yollarla həll edilməlidir. Biz bu ilin 26 noyabr tarixli üçtərəfli bəyanatında nəzərdə tutulan, Ermənistan-Azərbaycan sərhədində sabitliyin və təhlükəsizliyin səviyyəsinin artırılması üçün addımların atılmasına dair razılaşmaları dəstəkləyirik. Aydındır ki, vəziyyətin gərginliyini azaltmaq üçün tədbirlər həmişəkindən daha zəruridir, onlar birinci dərəcəli əhəmiyyət kəsb edir”, - deyə Zas bildirib.

O, həmçinin bəyan edib ki, KTMT Ermənistan hökumətinin siyasi-diplomatik vasitələrlə vəziyyəti həll etmək üçün atdığı addımları dəstəkləyir. Bu, hərbi ittifaqda yeganə çıxış yolu hesab olunur. Təşkilatın baş katibinin sözlərinə görə, ATƏT-in Minsk qrupunun həmsədrliyinin imkanlarından daha fəal istifadə etmək olar.

Məlumdur ki, Zas dekabrın 22-24-də Ermənistanda olacaq, burada ölkənin Baş naziri, Xarici İşlər naziri, Müdafiə naziri, Təhlükəsizlik Şurasının katibi ilə görüşəcək. Hazırda təşkilata Ermənistan sədrlik edir.

İrəvanda başlayan iqtisadi əməkdaşlıq üzrə Ermənistan-Rusiya hökumətlərarası komissiyasının iclasında iştirak etmək üçün Rusiya baş nazirinin müavini Aleksey Overçuk da Ermənistana gəlib. Overçuk ötən həftə Azərbaycanda olub. Rusiya rəsmisi Azərbaycan Prezidenti İlham Əliyev ilə görüşdə üçtərəfli işçi qrupunun fəaliyyəti və kommunikasiyaların açılması ilə bağlı məsələləri müzakirə edib.

Qeyd edək ki, işçi qrupuna həmsədrlik edən baş nazirin müavinləri sonuncu dəfə bu ayın əvvəlində görüşüblər. Soçidə üçtərəfli danışıqlarından sonra Rusiya prezidenti Vladimir Putin baş nazir müavinlərinin görüşdən sonra əldə olunan yeni razılaşmaları açıqlayacaqlarını bildirsə də, üçtərəfli işçi qrupu görüşdən sonra heç bir açıqlama verilməyib. Ermənistan baş nazirinin müavini Mher Qriqoryanın ofisi yalnız yaxın vaxtlarda görüşün planlaşdırıldığını bildirib, görüşün nə vaxt planlaşdırıldığını dəqiqləşdirməyib.

Azərbaycan Prezidenti bildirib ki, Zəngəzur dəhlizi Laçın dəhlizi kimi, gömrük məntəqələri olmadan fəaliyyət göstərməlidir. Paşinyan isə cavab verib və vurğulayıb ki, həmin paralellər Ermənistan tərəfi üçün qəbuledilməzdir.

Qeyd edək ki, üçtərəfli işçi qrupda Ermənistanı təmsil edən baş nazirin müavini Mher Qriqoryanın ofisi Aleksey Overçukun səfəri zamanı regional kommunikasiyalar üzrə hər hansı müzakirənin planlaşdırılmadığını bildirib. İclasın mövzusu Ermənistan-Rusiya ikitərəfli gündəliyidir.

Brüssel danışıqlarından sonra Moskvanın Ermənistan-Azərbaycan məsələsinə nəzarəti bərpa etməyə çalışdığı nəzərə çarpır. Qərb göstərir ki, hər şeyi Putinin “çiyinlərinə” buraxmayacaq.

Dünən Rusiya və Fransa prezidentləri telefon danışığı zamanı Qarabağ məsələsi ətrafında yaranmış vəziyyətə toxunublar. Onlar vəziyyətin sabitləşdirilməsi, regionda dinc həyatın bərqərar olması, iqtisadi və nəqliyyat əlaqələrinin bərpası istiqamətində görülən səylərdən məmnunluq ifadə ediblər. Putin və Makron həmçinin qeyd ediblər ki, Rusiya və Fransa bu məsələlər üzərində işləyir və gələcəkdə sinxron hərəkət etmək niyyətindədirlər. İki lider bir sıra beynəlxalq məsələlərə, xüsusən də Ukraynadakı vəziyyətə də toxunublar.

Qeyd edək ki, Brüsseldəki üçtərəfli görüşdən sonra Makron təkbətək görüş təşkil etmişdi. Bir tərəfdən Rusiya ilə Qərb arasında gərginlik dərinləşir, Putin ABŞ-ı günahlandırır. Putin deyib ki, Avropadakı gərginlikdə ABŞ günahkardır. O əlavə edib ki, NATO Rusiya sərhədləri boyunca hərbi infrastruktur yerləşdirir və Qərb aqressiv xəttini davam etdirərsə, Rusiya adekvat hərbi-texniki tədbirlər görəcək.

Putin hansı tədbirlərdən söhbət getdiyini açıqlamayıb. Eyni zamanda o, Rusiyanın təminat tələbinin ultimatum olmadığını, Qərb dövlətlərinin tezliklə onlara “aydın cavab” verməli olduğunu israr edib. “Silahlı münaqişələr və qan tökülməsi bizim seçimimiz deyil, biz məsələləri siyasi-diplomatik yolla həll etmək istəyirik. Ancaq biz təhlükəsizliyimiz üçün aydın hüquqi təminat istəyirik”, - deyə Putin bildirib.

Rəsmi Kreml Qərbin Rusiyanın təkliflərini qəbul etməməsi və ya cəld cavab verməməsi halında Rusiyanın nə edəcəyini demir. Əvəzində Rusiyanın müdafiə naziri Sergey Şoyqu Müdafiə Nazirliyinin genişləndirilmiş iclasında Ukraynanın NATO və NATO ölkələri arasında hərbi əməkdaşlığının Rusiya üçün təhlükə yaratdığını bildirib və əlavə edib ki, Donbas münaqişəsi zonasında ABŞ-ın bəzi özəl hərbi şirkətlərinin döyüşçüləri var və təxribat hazırlanır.

Eyni zamanda Amerika tərəfi Rusiyanın mümkün təcavüzünə Qərbin çox sərt cavab verəcəyini bəyan edir. ABŞ-ın ATƏT-dəki səfiri Maykl Karpenter “Nastoyi Vremya” nəşrinə müsahibəsində deyib: “Vaşinqton onun müttəfiqləri Rusiyanın Ukraynaya təcavüzünü cavabsız qoymayacaq. Cavab hərtərəfli olacaq, təbii ki, iqtisadi tədbirlər olacaq, amma əminəm ki, siyasi, diplomatik, ola bilsin ki, hərbi nəticələr olacaq”.

Eyni zamanda Karpenter bildirib ki, NATO-nun Şərqdə nüvə silahı yerləşdirmək planı yoxdur. Bundan əvvəl isə NATO-nun baş katibi Yens Stoltenberq belə bir fürsətdən danışmışdı.

Beləliklə, region üçün kifayət qədər çətin dövr formalaşır. Rusiya-Qərb gərginliyi siqnalları Ermənistan-Azərbaycan platformasına da ötürülə bilər ki, bu da regional sülhün əldə olunması imkanlarını daha da daraldacaq. Habelə Ermənistan hakimiyyətinin balanssız, təxribatçı siyasəti davam edərsə, vəziyyət daha da gərginləşə bilər.

Asif Cəfərov