Tehran bu yolla Bakıdan “əvəz” çıxdı - Dövlət işinə "evcik-evcik oyunu" kimi baxırlar...

6-05-2023, 10:44           
Tehran bu yolla Bakıdan “əvəz” çıxdı -
İran tərəfindən Azərbaycanın 4 diplomatına qarşı belə bir hərəkətin olacağı gözlənilən idi. Öz diplomatlarının Azərbaycandan çıxarılmasına cavab vermək istəyən İran bu cür addım atdı.

TEREF.AZ bildirir ki, bu sözləri Axar.az-a güneyli tanınmış siyasətçi, Güney Azərbaycan Demokrat Partiyasının sözçüsü Mahmud Bilgin İranın 4 diplomatımızı arzuolunmaz şəxs elan etməsini şərh edərkən deyib.

Ölkə parlamentində qarşılıqlı addım prinsipi ilə bağlı tələblərin olduğunu deyən Bilgin Tehranın çoxdan gözlədiyi fürsəti dəyərləndirdiyini qeyd edib:

“İran Azərbaycanla bağlı mənfi münasibətləri nə olursa olsun gündəmdə tutmağa çalışır. Son bir aya nəzər salsaq görərik ki, İranın yüksək səviyyəli şəxslərindən İran ordusunun Quru Qoşunlarının Komandanı Kiyumərs Heydəri, XİN sözçüsü Nasir Kənani, SEPAH-ın komandiri İsmayıl Qaani Azərbaycana qarşı sözdə hücuma keçiblər. Üçünün də danışıqlarına baxsaq, görərik ki, İranın strateji hədəfləri birbaşa Ermənistanı dəstəkləmək və Azərbaycana hücumları taktiki olaraq gündəmdə saxlamaqdır. Atdıqları son addım da eyni siyasətdən qaynaqlanır”.

Mahmud Bilgin bildirib ki, İranın diplomatlarımızla bağlı addımın Bakıdan fərqli olaraq heç bir əsası yox idi:

“Azərbaycanın İranın 4 diplomatını aprelin 6-da ölkədən çıxartmasının əsaslı səbəbləri var idi. Səfirliyin 4 əməkdaşı diplomatik statusa uyğun olmayan və Diplomatik Əlaqələr haqqında 1961-ci il Vyana Konvensiyası ilə ziddiyyət təşkil edən fəaliyyətlərə görə Azərbaycan hökuməti tərəfindən “persona-non-grata” (arzuolunmaz şəxs) elan edilmişdi. Onların Azərbaycan daxilində terror qüvvələri ilə əlaqələri var idi. Amma İrandakı Azərbaycan diplomatları tam mədəni, sivil və qanun çərçivəsində fəaliyyət göstərirdilər. İran yenə də öz mənfi siyasətini ortaya qoydu və yersiz qarşılılıq prinsipini bəhanə gətirərək bu addımı atdı. Ümumiyyətlə, son hadisələri də təhlil etsək, görərik ki, İranın Azərbaycana şovinist siyasətində heç bir dəyişiklik yoxdur”.












Teref.az © 2015
TEREF - XOCANIN BLOQU günün siyasi və sosial hadisələrinə münasibət bildirən bir şəxsi BLOQDUR. Heç bir MEDİA statusuna və jurnalist hüquqlarına iddialı olmayan ictimai fəal olaraq hadisələrə şəxsi münasibətimizi bildirərərkən, sosial media məlumatlarındanda istifadə edirik! Nurəddin Xoca
Məlumat internet səhifələrində istifadə edildikdə müvafiq keçidin qoyulması mütləqdir.
E-mail: n_alp@mail.ru