“Hər pulemyotdan, hər jiletdən, hər çəkmədən oğurlayırlar...”

Məlum olduğu kimi, Moskvanın Basmannı rayon məhkəməsi Rusiya Müdafiə nazirinin müavini Timur İvanovu iki ay müddətinə həbs edib. O, xüsusilə külli miqdarda rüşvət almaqda ittiham olunur. Bu maddəyə əsasən, məmuru 15 ilə qədər həbs cəzası gözləyir.

“AzPolitika” xəbər verir ki, Rusiyanın “Vajnıye istorii” nəşrinin yazdığına görə, rüşvət məsələsi ittihamın rəsmi hissəsidir, İvanov vətənə xəyanətdə şübhəli bilinir və onun saxlanması əmrini şəxsən Vladimir Putin verib.

Məlumdur ki, Sergey Şoyqunun “sağ əli” adlandırılan Timur İvanov nazirlikdə qoşunların mənzil təminatı, obyektlərin tikintisi və əsaslı təmiri, hərbi ipoteka məsələlərinə nəzarət edib. 2022-ci ilin dekabrında müxalif siyasətçi Aleksey Navalnının komandası Timur İvanovun ailəsi ilə bağlı araşdırma dərc edib. İvanov və arvadı Svetlana tətilə bir milyon avrodan çox pul xərcləyib. Məmurun həyat yoldaşının şəxsi xərcləri isə müharibədə dağıdılmış Ukraynanın Mariupol şəhərinin bərpası ilə məşğul olan şirkət tərəfindən ödənilib.

Rəsmi olaraq Timur İvanova qarşı cinayət işi Müdafiə Nazirliyinin ehtiyacları üçün podrat və subpodrat işləri ilə bağlıdır. İşin materialları şahidlərin ifadələrinə və əməliyyat fəaliyyətinin nəticələrinə əsaslanır.

Mənbənin TASS-a verdiyi məlumata görə, Müdafiə nazirinin müavini uzun müddət idi ki, operativ nəzarət hədəfində idi. Onun sözlərinə görə, cinayət işi FSB-nin hərbi əks-kəşfiyyat idarəsi tərəfindən dəstəklənir. İstintaq hesab edir ki, İvanov üçüncü şəxslərlə cinayət əlaqəsinə girib. İvanovla birlikdə "mürəkkəb vasitəçilər zənciri" vasitəsilə pul köçürmələrində iştirak edən bir neçə nəfər saxlanılıb.

Timur İvanov 2013-2016-cı illərdə “Oboronstroy” müəssisəsinin baş direktoru olub. 2016-cı ilin mayında Rusiya Prezidentinin fərmanı ilə müdafiə nazirinin müavini təyin edilib. O, ABŞ, Avropa İttifaqı, Böyük Britaniya və Kanadanın sanksiyaları altındadır.

“Dossier” layihəsinin araşdırmaçı jurnalisti İlya Rojdestvenski yerli mətbuata müsahibəsində bildirib ki, Timur İvanovun işində xəyanət maddəsi olmayacaq, çünki o, “icraçı”dır: “Əminəm ki, Timur İvanovun işində xəyanət məsələsi yer almayacaq. Çünki əks halda bu, o demək olardı ki, Timur İvanovun Sergey Şoyqu ilə işlədiyi tam 11 il ərzində Müdafiə Nazirliyinin rəhbərliyində bir xain, bir düşmən, bir casus və bir satqın olub. FSB-nin hərbi əks-kəşfiyyat idarəsi onu müdafiə nazirinin müavini vəzifəsinə təyin etməzdən əvvəl uzun müddət yoxlayıb. Bundan başqa, məncə, Timur İvanov və xəyanət bir az fərqli şeylərdir. Timur İvanov həyatı boyu özünü "icraçı" kimi göstərib - yəni, dövlət qurumlarından pul qoparan və ya kompensasiya üçün işləyən bir şəxs. Vətənə xəyanət dövlət sirrini vermək, hansısa xarici kəşfiyyat xidməti ilə danışıqlar aparmaq deməkdir. Düşünürəm ki, bu, bütünlüklə Timur İvanova aid deyil. İddia edilir ki, FSB əməkdaşları uzun illər onu izləyib, barəsində bəzi materiallar toplayıb və xəyanətdə şübhəli bilib. Düşünürəm ki, bu işdə nəzərdə tutulan xəyanət təhrif olunmuş fikirdir. Əminəm ki, Timur İvanovun işində əsl xəyanət üzə çıxmayacaq”.

Media Sergey Şoyqunun şəxsən İvanovun müdafiəsinə qalxdığını və hətta FSB əks-kəşfiyyatının nümayəndələri ilə mübahisə etdiyini yazıb. Bunun reallıqla hansısa əlaqəsi ola bilərmi?

Jurnalist bu suala belə cavab verib: “ Dəhşətli bir sirri açacağam: FSB əks-kəşfiyyat şöbəsi Müdafiə Nazirliyi ilə demək olar ki, gecə-gündüz məşğul olur. Onun vəzifələrinə Rusiya Federasiyasının bütün hərbi strukturlarına nəzarət və əks-kəşfiyyat əməliyyatları daxildir. Bu bölmənin zabitləri Müdafiə Nazirliyində kimin müxtəlif vəzifələrə təyin olunmasına və onların nə dərəcədə etibarlı olmasına mütəmadi olaraq nəzarət edir. Kimin hara tapşırıldığını, kimin nə işlə məşğul olduğunu, kimin kiminlə təmasda olduğunu diqqətlə izləyirlər. Rusiya hökuməti elə qurulub ki, müxtəlif təsir qrupları var, onlar bir-biri ilə vuruşurlar. Rusiya reallıqları elədir ki, əks-kəşfiyyatçılar təkcə FSB-nin işində deyil, bir çox idarələrin işində iştirak edirlər, qərarların qəbuluna, kadr siyasətinə təsir göstərirlər, kimin hara təyin olunmasına nəzarət edirlər, bu təyinatlar onlarla razılaşdırılmalıdır. Sergey Şoyqunun 2016-cı ildə bu vəzifəyə təyin olunan Timur İvanovla ilkin olaraq kifayət qədər çətin münasibəti olub. O zaman Şoyqunun bu vəzifəyə başqa namizədi var idi. Timur İvanov bütün bu illər ərzində sadiq həmkar olduğunu, heç bir başqa klanlara, nüfuzlu qüvvələrə baxmadığını, işini diqqətlə yerinə yetirdiyini, ona həvalə edilmiş sahəyə ciddi nəzarət etdiyini və onun ərazisinin hərbi tikinti sahəsi olduğunu sübut etməli idi. Səkkiz ilin nəticələrinə əsasən deyə bilərik ki, o, sadiqliyini sübut etdi. Ola bilsin ki, o, Sergey Şoyqunun ən yaxın dostlarından biri deyil, amma mütləq ilk 15-likdədir. Təbii ki, onun saxlanması Sergey Şoyquya zərbədir”.

Politoloq Fyodor Kraşeninnikov isə əmindir ki, onun həbsi hərbi işğalın tərəfdarları arasında çaşqınlıq yaradacaq: Vətən müdafiəçisi obrazı bayağı oğurluq ittihamlarına uyğun gəlmir: “Düşünürəm ki, vətənpərvərlərin nəzərində bu, Rusiya ordusunun nüfuzuna güclü zərbədir. Belə çıxır ki, ordu iki ildir oğurluqla məşğuldur, rəhbərlik isə korrupsionerdir və o qədər böyük miqyasdadır ki, daha onları həbs etməmək mümkün deyil. Sistem fərqli işləyir: korrupsioner məmur hər raketdən bir milyon dollar oğurlamaq üçün ard-arda yüz raket atır, sonda onun yüz milyonu var, amma ortada cəmi yüz raket görünür. Buna görə də, daha çox korrupsiya, daha çox müharibə lazımdır, çünki müharibə oğurlanmış hər şeyi silməyə imkan verir. Müharibə rüşvətxor məmurların arzusudur, müharibənin bitməməsini istəyirlər, çünki onlar bundan sonsuz pul qazanacaqlar. Təəccüblənirəm ki, bəziləri bunu başa düşmür və ucadan qışqırmağa davam edirlər ki, daha çox oğurlasınlar, onda müharibə daha tez bitəcək. Hər pulemyotdan, hər gülləkeçirməz jiletdən, hər çəkmədən bir şey oğurlamaq üçün bütün bu silahları istehsal edirdilər. Onlar oğurlamaq üçün silahlanma yarışında maraqlıdırlar. Başa düşməlisiniz ki, bu, Şoyqunun yaxın adamıdır, onun əldə etdiklərini öz lideri ilə paylaşdığı göz qabağındadır. Buna görə də, kimsə onun ayağının altını qazıb. Görünür, bu, təhlükəsizlik bloku daxilində müharibədir, orada qüvvələr bir-birini yeyir. Bu, bəlkə də Şoyquya təzyiq göstərmək və ya ondan tamamilə xilas olmaq cəhdidir, çünki yeni hökumət qurulur.

Təəssüf ki, bir korrupsionerin həbsi və onun yerinə hansısa başqa bir fırıldaqçının keçməsi Rusiya ordusunun müdafiə qabiliyyətinə və Ukraynadakı müharibənin gedişinə təsir etməyəcək…