Əhali 2024-cü ilin ilk yarısında “Access Bank”dan 9,9 milyon manat, şirkətlər isə 12,28 milyon manat depoziti geri çəkib.

Bu barədə bankın hesabatında göstərilir.

Belə ki, 2024-cü ilin əvvəlində bankda fiziki şəxslərin depozitlərinin həcmi 842,46 milyon manat olduğu halda, ilin ilk yarısında bu rəqəm 832,89 milyon manata kimi azalıb.

Hüquqi şəxslərin bankdakı əmanətlərinin həcmi isə 209,1 milyon manatdan 196,82 milyon manata enib. Başqa sözlə, bank bu ilin ilk 6 ayında fiziki şəxslər üzrə depozit portfelinin 1,2 %-ni, hüquqi şəxslər üzrə portfelin 6,2 %-ni itirib.

Ümumilikdə isə “Access Bank”ın əmanət portfeli bu il 21,85 milyon manat azalıb. Bankın əmanət portfeli ilin əvvəlinə nisbətən 2,1 % azalaraq 1 milyard 51,5 milyon manatdan 1 mlrd. 29,7 milyon manata enib.

Depozit portfelinin azalmasına baxmayaraq bank kredit təşkilatları və maliyyə institutları qarşısında öhədliklərini 144,2 milyon manatdan 197,5 milyon manata kimi artırması onun cəmi öhdəliklərini də artırıb.

Hesabat dövrü üzrə bankın aktivləri 1 milyard 478,7 milyon manata, öhdəlikləri 1 milyard 313 milyon manata yüksəlib. Bankın 115,7 milyon manat bölüşdürülməmiş zərəri isə onun cəmi kapitalını 164,9 milyon manat manata endirib.

Vətəndaşların və şirkətlərin “Access Bank”dan xeyli miqdarda depoziti geri çəkməsi, əmanət portfelinin azalması bankın bağlanmasına gətirib çıxara bilərmi?

İqtisadçı-ekspert Fuad İbrahimov “Cebheinfo.az”a bildirib ki, istənilən bankdan gözlənilmədən, yaxud qısa müddət ərzində müştərilər kapitalını geri çəkəndə o bank texniki defoltla üzləşə bilər:

“Burada da göründüyü kimi əgər vətəndaşlar birdən-birə kütləvi şəkildə vəsaitlərini geri çəkirlərsə, bu təhlükəlidir. Məlumdur ki, “Access Bank” da kapitalı cibində saxlamır. İstənilən bank kapitalı vətəndaşlardan depozit kimi götürür və haradasa, bir investisiya portfelində yerləşdirir.

Bildirim ki, gözlənilmədən vətəndaşlar kapitallarını geri çəkdikləri zaman nağd vəsaitin olmaması səbəbindən gərgin bir vəziyyətə yol açılır.

Nəticədə arzuolunmaz vəziyyət yaranır ki, sonda bank vətəndaş qarşısında götürdüyü öhdəliyini yerinə yetirə bilmir və beləliklə də, texniki defolt yaşanır.

Yaxud da fövqəladə hal, forsmajor formasında, gərək Mərkəzi Bank müvəqqəti yardım etsin ki, o bank vətəndaşlar qarşısında götürdüyü öhdəliyini yerinə yetirə bilsin.

Sonradan öz kapitalını yerləşdirdiyi digər mənbələrdən geri çəksin. Yəni arzuolunmaz vəziyyətdir, yaxşı hal deyil. Bankı uçuruma gətirib çıxara bilər”.