Xəbər verildiyi kimi, sentyabrın 10-da Rusiya qoşunları Kursk vilayətində əks-hücuma başlayıb. Ukrayna tərəfinin verdiyi məlumata görə, hazırda bölgədə vəziyyət qeyri-sabitdir.

“AzPolitika” xəbər verir ki, Amerika Müharibə Araşdırmaları İnstitutunun(ISW) hesabatına görə, Rusiya ordusunun hücumlarının miqyası və potensial perspektivləri hələlik bəlli deyil və qəti nəticələr çıxarmaq hələ tezdir.

Sentyabrın 11-ə aid geolokasiya görüntüləri Rusiyanın Juravli kəndindən şərqdə (Korenevonun şimal-şərqində) Ukrayna mövqelərini geri aldığını, 51-ci Hava Desant Alayının isə Snaqost kəndinin şimal və şimal-şərqinə (Korenevonun cənubu) irəlilədiyini göstərir.

Rusiya hərbi bloqerlərinin sözlərinə görə, rus qoşunları Korenevo yaxınlığında şimaldan əks-hücuma keçib və sürətlə Snaqost istiqamətində irəliləyib. Bəzi mənbələr rusların Snaqostu tamamilə ələ keçirdiklərini iddia edirlər, lakin ISWbu iddiaları dəstəkləyən heç bir əyani sübut görmür.

Bundan əlavə, 51-ci hava desant alayının və 155-ci dəniz piyada briqadasının bölmələrinin Snaqost bölgəsində irəliləyərək Krasnojovtnevoe, Komarovka, Vişnevka, Apanasovka, 10 oktyabr, Obuxovka, Byaxovo, Vnezapnoye və Qordeyevkanı aldığı bildirilir. Lakin ISW bunu təsdiq və ya təkzib etmir.

İnstitutun analitiklərinin fikrincə, Rusiya hücum üçün nisbətən bacarıqlı bölmələri cəlb etsə də, bu əməliyyatların nə dərəcədə effektiv olacağı hələlik bəlli deyil. Məsələ burasındadır ki, bu bölmələr, xüsusən də 155-ci Dəniz Briqadası dəfələrlə deqradasiyaya uğrayıb və bərpa olunub.

ISW hesabatında deyildiyi kimi, Rusiya Federasiyasının Ukrayna Silahlı Qüvvələrini Kursk bölgəsindən sıxışdırıb çıxarmaq və ya yeni əks-hücumlardan qorunmaq üçün lazım olan kifayət qədər qoşuna malik olub-olmadığı hələ də aydın deyil. Analitiklər bu məqamı xüsusi vurğulayırlar. Onların fikrincə, Rusiya Federasiyası Ukraynadakı qüvvələrinin bir hissəsini Kurska köçürməyi planlaşdıra bilər, lakin belə bir yerdəyişmənin nə vaxt baş verəcəyi bəlli deyil.

Bundan əvvəl “DeepState” analitikləri də Rusiya qoşunlarının Rusiyanın Kursk vilayətində aktiv hücum əməliyyatlarına başladığı barədə məlumat vermişdilər. Xüsusilə də ruslar Kursk vilayətində Ukrayna qoşunlarının sol cinahından hücuma keçiblər. Bunun üçün zirehli texnikaları əvvəlcə Seymdən, sonra isə daha kiçik çaylardan keçiriblər.

Lakin bir çox hərbi ekspertlərin fikrincə, Rusiyanın bu hücumu Ukraynanın maraqlarına uyğundur, çünki bunun üçün ruslar Ukrayna ərazisindən əsgər köçürməli olacaqlar.

Ukraynaya gəlincə, istefada olan general-leytenant İqor Romanenkonun dediyi kimi, Ukrayna qoşunları Kursk vilayətində müdafiə əməliyyatına başlayır…