Yeni tərkibdə formalaşan Azərbaycan Respublikası Milli Məclisinin sədrinin, sədr müavinlərinin və bəzi komitə sədrlərinin adları müəyyənləşib.

TEREF xəbər verir ki, Manset.az-ın əldə etdiyi məlumata görə, Milli Məclisin Sədri əvvəlki illərdə olduğu kimi, Sahibə Qafarova olacaq.

Sahibə Qafarovanın birinci müavini Əli Hüseynli vəzifəsindən gedəcək. Onu Baş nazirin müavini Əli Əhmədov əvəzləyəcək. Milli Məclisin Sədrinin birinci müavini təyin ediləcək Əli Əhmədovun eyni zamanda, Regional məsələlər komitəsinə də rəhbərlik edəcəyi gözlənilir.

Milli Məclis Sədrinin digər müavini Sosial Tədqiqatlar Mərkəzinin İdarə Heyətinin sədri Zahid Oruc olacaq. O, bu postda sabiq müavin Adil Əliyevi əvəzləyəcək. Milli Məclis Sədrinin bir digər müavini isə professor Fəzail İbrahimli olacaq.

Milli Məclisin Mədəniyyət komitəsinin sədri Fazil Mustafa da vəzifəsindən gedəcək. Onu bu vəzifədə parlamentə yeni deputat seçilən Günay Əfəndiyeva əvəz edəcək.

Parlamentin digər komitə sədrinin də vəzifəsinə aydınlıq gəlib. Bu, Elm və Təhsil komitəsidir. Komitəyə Mehriban Vəliyeva sədrlik edəcək. O, bu postda Bəxtiyar Əliyevi əvəzləyəcək.

Milli Məclisin Gənclər və İdman komitəsinin sədrliyinə isə iki namizədin olduğu bildirilib. Onlar deputat Ülvi Quliyev və Vüqar İskəndərovdur. Bu iki deputatdan biri komitənin sədri olacaq.