Maliyyə Bazarlarına Nəzarət Palatasının işçi tərkibi dəyişdirilməlidir.

Bunu Sherg.az-a bank sahəsində böhranın aradan qaldırılması məqsədilə yaradılan Maliyyə Bazarlarına Nəzarət Palatasının fəaliyyətindən danışarkən iqtisadçı-ekspert Fuad İbrahimov deyib.

Ekspert bildirib ki, komitənin işçi qüvvəsi əvvəlki Qiymətli Kağızlar üzrə Dövlət Komitəsinin şəxsi heyətidir:

"Həmin komitə isə 10-12 il ərzində dünya iqtisadiyyatında qiymətli kağızlara uyğun və bazar iqtisadiyyatına yönəlmiş heç bir ciddi tədbir həyata keçirməyib. Onun fəaliyyəti yalnız "Azərlotoreya” kimi televiziya verilişi səviyyəsində olan işlərlə məhdudlaşıb. Həmin komanda indi Maliyyə Bazarlarına Nəzarət Palatasında fəaliyyət göstərir. Bu quruma isə faktiki nəzarət yoxdur. Komitənin işinin lazımi səviyyədə təşkil olunması və gücləndirilmiş tədbirlərin həyata keçirilməsi üçün öncə mövcud şəxsi heyət dəyişdirilməlidir. Banklarla vətəndaşlar arasında problemli dollar kreditləri ilə bağlı lazımi tədbirlər həyata keçirilmədi. Lakin borclularla kommersiya bankları arasında əlaqənin düzgün formalaşdırılmasına çalışılsa, bu problem tənzimlənə bilərdi. Bunlar həyata keçirilmədiyindən hazırda bank sisteminin çökməsini müşahidə edirik”.

F. İbrahimov əlavə edib ki, vəziyyətin düzəlməsi üçün isə on illərlə aktiv fəaliyyət lazımdır:

"İqtisadi cəhətdən inkişaf etmiş çox ölkə bu böhranı keçib və bərpası 10 illərlə vaxt alıb. Bizdə də böhrandan çıxış ağır səviyyədə gedəcək. Ancaq hazırda Azərbaycanda buna institusional formada müdaxilə həyata keçirilmir. Görülən tədbirlər xırda çıxış yolu məsələləridir. Böhran vəziyyətində olan ölkədə isə kommunal xidmətlərin qiymətlərinin qaldırılması, inflyasiya sosial etirazın artmasına səbəb olur. Belə iqtisadi çətinliklər olduğu müddətdə yumşaldıcı tədbirlər görülməlidir. Ancaq bu yolla sosial narazılığı və böhranı aradan qaldırmaq olar”.

Qeyd edək ki, Azərbaycanda bank və digər maliyyə sahəsində stabilliyin yaradılması məqsədilə formalaşdırılan Maliyyə Bazarlarına Nəzarət Palatasının işində ciddi irəliləyiş müşahidə olunmur.