Bakıda yeni ticarət-istirahət mərkəzinin tikintisinə başlanılıb.

Musavat.com xəbər verir ki, "Baku City Mall" adlanacaq mərkəz Bakı Ağ Şəhər layihəsi çərçivəsində inşa olunacaq. Artıq "Baku City Mall"-un yerləşəcəyi ərazidə işlərə başlanılıb, torpaq yatağı dəyişdirilib, həmçinin tikintinin bir hissəsi tamamlanıb.

Bu ticarət mərkəzi Bakıda şəhərin mərkəzinə yaxın yerləşən ən iri "mall" olacaq. Xətai rayonu ərazisində, Nobel prospektində inşa edilən ticarət obyektində yüzlərlə mağaza, restoranlar, kinoteatr, uşaq əyləncə mərkəzi və s. nəzərdə tutulub.

Bu ticarət mərkəzinin tikintisini "Pasha Construction" həyata keçirir. Tikinti şirkətinin rəsmi saytında bu haqda məlumat da verilib. Məlumatda deyilir ki, "Ticarət və əyləncə mərkəzinin layihəsi müxtəlif növ əyləncələri, ticari və digər xidmətləri özündə cəmləşdirən bir məkandır. Ticarət mərkəzi ölkədə turizmin inkişafına gələcəkdə dəyərli tövhəsini verəcək, regionda ən iri ticarət kompleksi olmalıdır. Bakı Buxtasında yerləşən olimpiya ölçülərinə malik panoram görünüşlü buz meydançası buranı şəhər tədbirləri üçün konsert zalına çevirmək imkanına malikdir.

Buz meydançasının ətrafında müxtəlif səviyyələrdə yerləşmiş restoranlar və kafelər sahilyanı bulvara, seyretmə çarxına və Bakı buxtasına unudulmaz mənzərə təklif edəcək. Burada Ticarət Mərkəzi vasitəsilə Bulvarı şəhərin şimal hissəsi ilə birləşdirəcək yeni piyada körpüsü də salınacaq. Qərbi və Şərqi sahilyanı rayonlar boyu davam edən promenadlar isə alleya təşkil edərək və ticarət mərkəzinin daxilində birləşərək, sakinlərin və qonaqların gəzintiləri üçün gecə-gündüz açıq olacaq.

İki özünəməxsus qalereyanın kəsişməsində hökm sürən atmosfer bu məkanı ailə istirahətinin ən sevimli yerlərindən birinə çevirməyi vəd edir".

Ərazi – 400 000 kv.m,
7 000 dayanacaq yeri,
Yaşayış sahəsi – 8 000 kv.m.
Ofis sahəsi – 32 000 kv.m.
Otel – 200-ə qədər nömrəli

"Baku City Mall"-ın dizayn işlərini ABŞ-ın məşhur dizayn şirkəti olan "DLR Group" öz üzərinə götürüb. Bu şirkət bu günə kimi Çində, Hindistanda, Səudiyyə Ərəbistanında və digər ölkələrdə böyük layihələrdə iştirak edib.

Bəhs etdiyimiz ticarət mərkəzinin nə zaman təhvil veriləcəyi məlum deyil. Amma hazırda ərazidə qızğın iş gedir.