Azərbaycanın bütün bölgələrində enerji təminatı bərpa olunub.



APA-nın xəbərinə görə, Bakının bütün rayonlarına, habelə respublikanın digər şəhər və rayonlarına elektrik enerjisinin verilişi təmin olunub.



“Azerenerji” ASC gücləndirilmiş iş rejimində fəaliyyətini davam etdirir.



**** 23.50



Mingəçevir IES-in 6-cı enerji blokunda baş verən qəzadan sonra aparılan təmir-bərpa işləri başa çatdırılıb. APA-nın xəbərinə görə, Bakının enerji təminatı bərpa olunub, respublikanın əksər şəhər və rayonlarına (ölkənin Cənub, Şimal, Mil-Muğan, Qərb və Qarabağ bölgələrinə) elektrik enerjisinin verilişi təmin olunub.



Digər şəhər və rayonlara elektrik enerjisinin verilişinin təmin olunması üçün tədbirlər görülür.



***** 21.31



Mingəçevir şəhərində fəaliyyət göstərən Azərbaycan İstilik Elektrik Stansiyasının 6-cı enerji blokunda baş verən qəzadan sonra aparılan təmir-bərpa işləri başa çatdırılıb. APA-nın yerli bürosunun xəbərinə görə, axşam saat 21:00-da stansiyadan Mingəçevir şəhərinə enerji verilişi bərpa olunub.



APA-nın Mil-Muğan bürosunun xəbərinə görə, axşam saat 21:30 radələrində Şirvan şəhərinə də enerji verilişi bərpa olunub.



APA-nın cənub bürosunun xəbərinə görə, axşam saatlarında Astaraya elektrik enerjisinin verilişi təmin olunub.



Digər şəhər və rayonlara elektrik enerjisinin verilişinin təmin olunması üçün tədbirlər görülür.



*** 20.15



Bakının əksər rayonlarında və ölkənin şimal bölgəsində enerji təchizatında yaranmış problem aradan qaldırılıb.



APA-nın məlumatına görə, bu barədə Bakı sakinləri sosial şəbəkələrdə yazıblar.



Yaxın dəqiqələrdə paytaxtın digər ərazilərində, həmçinin ölkə ərazisində elektrik enerjisinin təchizatının bərpa olunacağı gözlənilir.



***



Saat 19:14



Mingəçevir İES-in qəza baş vermiş 6-cı blokunda təmir-bərpa içləri görüləndən sonra yoxlama-sınaq işləri həyata keçirilib.


"APA-Economics"in əldə etdiyi məlumata görə, bu zaman yaranmış titrəyişdən yenidən qəza vəziyyəti yaranıb.



Hazırda qəza nəticələrinin aradan qaldırılması üçün tədbir görülür.





***

Saat 19:07



Bakının və ölkənin enerji təchizatında yenidən problem yaranıb.



"APA-Economics"in məlumatına görə, sosial şəbəkələrdə Bakının bəzi rayonlarında elektrik enerjisinin verilişi yenidən dayandırıldığı yazılıb.



Eyni zamanda, bəzi rayonlarda elektrik enerjisi ilə təchizatda fasilələr yaranması barədə yerli sakinlər məlumat veriblər.