Polis çərşənbə günü səhər Vaşinqton şəhərində Corc Vaşinqton Universitetində Fələstin tərəfdarı olan nümayiş düşərgəsini dağıdıb və 33 nəfəri həbs edib.

Kolumbiya mahalının Polis Departamenti bildirib ki, həbslər bir polis məmuruna hücum və qanunsuz giriş səbəbindən həyata keçirilib.

Çərşənbə axşamı gecə onlarla etirazçı GWU (Corc Vaşinqton Universiteti) prezidenti Ellen Qranberqin evinə yürüş etdikdən sonra polis çadır düşərgəsini dağıtmağa başlayıb. Etirazçlılar əllərində "Fələstinə azadlıq" və "Əlləri Rəfahdan çəkin" yazılmış plakatlar nümayiş etdiriblər. Polis hadisə yerinə çağırılsa da, həmim vaxt həbslər baş tutmayıb.

Qəzzanın ən cənub şəhəri olan Rəfah, əhalinin böyük hissəsinin toplandığı ərazidir. Bu ərazi həm də Fələstin ərazisinə humanitar yardımın gətirilməsi üçün dəhlizdir.

İsrail çərşənbə axşamı Rəfah keçidinin Qəzza tərəfini ələ keçirib, yaxınlıqdakı Kerem Şalom keçidini bağlayaraq humanitar qrupların tənqidi ilə üzləşib. İsrail çərşənbə günü Kerem Şalomu yenidən açdığını bildirib.

GWU rəsmiləri tələbələrə xəbərdarlıq edib ki, universitetin həyətində, kampusun açıq yerində etiraz aksiyalarında iştirak etdiklərinə görə universitetdəki təhsildən kənarlaşdırıla bilərlər.

"Universitet tələbələrin ifadə azadlığı hüquqlarını qorumağa sadiq olsa da, düşərgə bir çox universitet və şəhər qaydalarını birbaşa pozan iştirakçıların qeyri-qanuni fəaliyyətinə çevrilib", GWU-nun bəyanatında deyilir.

Nümayiş təşkilatçıları bildiriblər ki, polis çərşənbə günü etirazçı kütləni dayandırmaq üçün bibər qazından istifadə edib.

Polis bildirib ki, onlar nümayişçiləri dağıdıblar, çünki "etirazın gərginliyi tədricən artıb".

Konqresin komitəsi çərşənbə günü universitet düşərgəsi ilə bağlı dinləməni ləğv edib. Kolumbiya mahalının meri Muriel Bouzer və polis rəisi Pamela Smitin Nümayəndələr Palatasının Nəzarət və Hesabat Komitəsi qarşısında etirazla bağlı şəhərin rəftarına dair ifadə verməsi planlaşdırılırdı.

Associated Press-in məlumatına görə, ABŞ üzrə nümayişlərdə 50 universitet kampusunda 2600-dən çox Fələstin tərəfdarı olan insan həbs edilib.

Ümummilli kampus etirazları İsrailin Qəzzaya hücumuna cavab olaraq HƏMAS-ın oktyabrın 7-də İsrailə hücum edərək 1200-ə yaxın insanın ölümünə və 250-yə yaxın girov götürülməsinə cavab olaraq başlayıb.

HƏMAS-ın idarə etdiyi Qəzzada Səhiyyə Nazirliyinin məlumatına görə, İsrailin hücumu nəticəsində 34 mindən çox fələstinli həlak olub. İsrail xəbərdarlıq edib ki, atəşkəs danışıqları girovların azad edilməsini təmin edə bilməsə, Rafahdakı əməliyyatını "dərinləşdirə" bilər.