Rusiya qoşunlarının Ukraynada hərbi cinayətləri davam edir.

“AzPolitika” Ukrayna mediasına istinadla xəbər verir ki, Ukrayna hüquq-mühafizə orqanlarının əməkdaşları rusiyalı hərbçilərin növbəti hərbi cinayətini aşkar ediblər.

Belə ki, Donetsk vilayətinin Pokrovsk şəhəri istiqamətində əsir götürülmüş 5 ukraynalı hərbçinin edam edilməsi ilə bağlı araşdırmalar başlayıb. Bu barədə Donetsk vilayət prokurorluğu məlumat və fotogörüntülər yayıb.

İlkin məlumatlara görə, 2024-cü ilin noyabrında rus qoşunları Pokrovsk rayonunun Petrovka kəndi yaxınlığındakı Ukrayna Müdafiə Qüvvələrinin mövqelərinə basqın ediblər. Hücum nəticəsində Ukrayna Silahlı Qüvvələrinin beş əsgəri geri çəkilərək bir evdə gizlənməyə məcbur olub.

Evi mühasirəyə alandan sonra rus hərbçiləri ukraynalı müdafiəçiləri əsir götürüblər. Onlar evi silahsız tərk edərək yerə uzanmağa məcbur olublar. İşğalçı əsgərlər beynəlxalq humanitar hüququ pozaraq ukraynalı əsirləri avtomat silahlardan güllələyiblər.