Şəhər rəsmiləri bildirib ki, Ohayo polisi çərşənbə axşamı Nyu Albani anbarında bir nəfəri öldürən və beş nəfəri yaralayan silahlı şəxsi axtarır.

Nyu Albani rəsmiləri açıqlamasında bildiriblər ki, atəş açan şəxsin kimliyi müəyyən edilib və polis şübhəlinin tutulması üçün çalışır.

Nyu Albani polis rəisi Qreq Cons NBC4-ə ətraflı məlumat vermədən deyib ki, hadisə "məqsədli hücum" kimi görünür. O əlavə edib ki, hücum edənin motivləri hələlik məlum deyil.

Cons bildirib ki, təxminən 150 nəfər yaxınlıqdakı binaya təxliyə edilib. Beş zərərçəkən xəstəxanaya çatdırılıb.

Atışma kosmetika, şəxsi gigiyena vasitələri və kimyəvi məişət vasitələri istehsal edən "KDC/One" istehsal şirkətinin anbarında baş verib. Yerli medianın yaydığı fotolarda onlarla polis maşınının hadisə yerinə gəldiyi görünür.

Hadisə yerində odlu silahın tapıldığı bildirilsə də, onun növü barədə təfərrüatlar açıqlanmır.