Üzüm həm dadlı, həm də qidalandırıcı meyvə kimi tanınır. Bu meyvə K vitamini, mis, B qrupu vitaminləri, lif və antioksidantlarla zəngindir. Üzümün qabığı və tumları isə xüsusilə yüksək miqdarda resveratrol, quercetin və antosiyaninlər ehtiva edir ki, bu maddələr hüceyrə qorunmasında mühüm rol oynayır.Üzüm polifenollarla zəngindir və bu maddələr “yaxşı” xolesterolu tənzimləyərək ateroskleroz riskini azaldır. Flavonoidlər qanın laxtalanmasının qarşısını alır və ürək-damar sisteminə müsbət təsir göstərir. Üstəlik, cəmi 100–120 qram üzüm K vitamininin gündəlik ehtiyacının 20 faizindən çoxunu təmin edir.Araşdırmalara görə, üzüm xərçəng riskinin azalmasına da töhfə verə bilər. Ancaq bu meyvənin tərkibindəki yüksək şəkər miqdarı bəzi insanlar üçün risk yaradır.Diyetoloqlar bildirir ki, şəkərli diabet, artıq çəki və ya mədə-bağırsaq problemləri olan şəxslər üzümü az miqdarda istehlak etməlidir. Xora və digər həssaslıq hallarında bu meyvə narahatlıq doğura bilər.Tam sağlam insanlara gündə 400 qramdan çox üzüm yeməmək tövsiyə olunur. Uşaqlara isə bir yaşdan sonra, tədricən az miqdarda verilməlidir. Allergiya riski daha az olan yüngül növlərə üstünlük verilməsi məsləhətdir. Gündə bir giləmeyvədən başlayaraq, miqdar tədricən 50–100 qramadək artırıla bilər.