İraq hakimiyyətinin qərarına əsasən, İraq Kürd Muxtariyyətinin hava limanlarına uçuşların cümə günü axşam saatlarında bağlanması qərarı qətidir. Bu səbəbdən xarici ölkə vətəndaşları hava limanlarının xidməti bağlanmadan əvvəl bölgəni tərk etmək üçün tələsirlər.

Axar.az xəbər verir ki, bu barədə RİA informasiya yayıb.

“Ərbil hava limanında çox sayda sərnişin var. Onlar uçuşların dayandırılmasına qədər bölgəni tərk etməyə tələsirlər. Bir çoxları burada bilet ala bilmək ümidi ilə hava limanına biletsiz gəlib. Hava limanının hər tərəfi Kürdüstan bayraqları ilə bəzədilib. İşçilərin yaxasında Kürdüstan ərazisi formasında nişanlar asılıb. Burada İraq bayrağı yoxdur”, - nəşrin hadisə yerində olan müxbiri yazıb.

Hava limanının rəhbərliyi uçuşların 18:00-da bağlanacağını təsdiqləyib.