Azərbaycan futbolunun rüsvayçı oyunu: Üç qırmızı, 19 sarı vərəqə, üç penalti, bir sayılmayan qol
26-04-2021, 16:50
Azərbaycan Premyer Liqasının XXIV turunun “Sabah” – “Neftçi” oyunu (2:2) hakim qalmaqalı ilə yadda qalıb.
Baş hakim Vüqar Həsənli Masazır qəsəbəsindəki “Kapital Bank Arena”da keçirilən qarşılaşmada meydan sahiblərinin üç futbolçusuna qırmızı vərəqə göstərib.
O, “Sabah”ın futbolçuları – Bəhlul Mustafazadəni (58-ci dəqiqə), Filip İvanoviçi (86-cı dəqiqə) və Təmkin Xəlilzadəni (89-cu dəqiqə) meydandan qovub. Həmçinin, “Sabah”ın serb məşqçisi Miloş Yevtiç də 90+1-ci dəqiqədə təhqiredici jestə görə qırmızı vərəqə alıb.
Ümumilikdə isə bu matçda 19 sarı vərəqə göstərilib. Bunlardan üçü məşqçilərə – Miloş Yevtiçə (89-cu dəqiqə), Ramin Quliyevə və Samir Abbasova (hər ikisinə oyundan sonra) tuşlanıb.
Matçda isə üç penalti təyin olunub: biri “Neftçi”nin, ikisi “Sabah”ın qapısına. “Neftçi”nin yaponiyalı ulduzu Keysuke Hondanın vurduğu təmiz qol isə passiv oyundankənar vəziyyət səbəbindən qeydə alınmayıb.
