UEFA Avropa Liqasında 1/4 final mərhələsinə start verilib. Apasport.az saytının məlumatına görə, Avrokuboklarda Türkiyənin yeganə təmsilçisi olan “Beşiktaş” “Lion”la qarşılaşıb.

Fransada baş tutan oyunda azarkeşlər arasında yaranmış ixtişaşlar səbəbindən 45 dəqiqə gec başlayıb. Oyuna qonaqlar sürətli start veriblər. Artıq 15-ci dəqiqədə Babel hesabı açıb. İlk hissə bu hesabla başa çatıb. İkinci yarıda "Lion" hücumlarını artırsa da, "qara qartallar"ın müqavimətini qırmaq ancaq son dəqiqələrdə mümkün olub. Əvvəlcə Tolisso status-kvonu bərpa edib. Bundan 2 dəqiqə sonra isə qapıçı Fabrinin dəhşətli səhvi türklərə məğlubiyyətə başa gəlib.

Turnirin əsas favoriti “Mançester Yunayted” isə Belçika səfərinə yollanıb. “Qırmızı şeytanlar”ın rəqibi “Anderlext” olub. Enişli-çıxışlı qrafik cızan ingilislər səfərdən 1:1 hesablı bərabərliklə dönüblər.

1/4 final mərhələsinin digər matçlarında “Ayaks” “Şalke”ni məğlub edib- 2:0. “Selta” isə “Genk”i qəbul edib. Viqodakı oyunda 5 qol qeydə alınıb. Meydan sahibləri 3:2 hesablı qələbəyə seviniblər.

Avropa Liqası
1/4 final mərhələsi, ilk oyunlar

13 aprel

“Lion” (Fransa) – “Beşiktaş” (Türkiyə) - 2:1
Qol: Tolisso, 83, Morel, 85 - Babel, 15

Baş hakim: Metyu Lahoz (İspaniya)
Lion. “Park Olimpik Lion” stadionu

“Anderlext” (Belçika) – “Mançester Yunayted” (İngiltərə) - 1:1
Qollar: Dendonker, 89 - Mxitaryan, 37

Baş hakim: Feliks Brix (Almaniya)
Anderlext. “Konstant Vanden Stok” stadionu

“Ayaks” (Hollandiya) – “Şalke” (Almaniya) - 2:0
Qollar: Klaasen, 23, 52

Baş hakim: Sergey Karasyov (Rusiya)
Amsterdam. “Amsterdam Arena”

“Selta” (İspaniya) – “Genk” (Belçika) - 3:2
Qollar: Sispo, 15, Aspas, 18, Quidetti, 38 - Boetus, 10, Buffel, 67

Baş hakim: Klemen Turpin (Fransa)
Viqo. “Estadio de Balaydos”