Bakı. 2 may. REPORT.AZ/ Bu gün futbol üzrə Çempionlar Liqasında digər finalçı müəyyənləşəcək.

“Report”un məlumatına görə, İspaniya təmsilçisi “Real Madrid”in rəqibi İtaliyada “Roma” ilə İngiltərənin “Liverpul” komandalarının duelində bəlli olacaq.

İlk matçda rəqibini 5:2 hesabı ilə məğlub edən mersisaydlılar cütün taleyini ilk görüşdə də həll edə bilərdilər. Lakin Yugren Kloppun rəhbərlik etdiyi kollektiv 69-cu dəqiqəyə qədər Muhamed Salahla Roberti Firminonun dublu, Sadio Manenin 1 qolu ilə öndə olsa da, son dəqiqələrdə 2 qol buraxaraq, rəqibi ümidləndirdi.

Yarışın 1/4 finalında səfərdə İspaniya “Barselona”sına 1:4 hesabı ilə uduzmağına rəğmən, cavab qarşılaşmasında 3 cavabsız qolla qalib gələn “canavarlar” eyni möcüzəni “Liverpul” ilə qarşılaşmada etmək istəyirlər.

“Roma”nın heyətində zədəlilər - Rik Karsdorp və Qrequar Defrel meydana çıxa bilməyəcək. Kevin Strootman ilə Dieqo Perottinin durumu sual altındadır. Adam Lallana, Emre Can, Aleks Oksleyd-Çemberlen və Joel Matip zədə üzündən “Liverpul”a kömək etməyəcəklər. Cordan Hendersonun oynayıb-oynamayacağı isə dəqiq bilinmir.

Qeyd edək ki, final matçı mayın 26-da Ukraynanın paytaxtı Kiyevdə keçiriləcək.

Çempionlar Liqası

Yarımfinal, cavab oyunu

2 may

22:45. “Roma” (İtaliya) – “Liverpul” (İngiltərə)

Baş hakim: Damir Skomina

İlk oyun – 2:5