Almaniyanın Vaysvasser şəhərində ümummilli lideri Heydər Əliyevin anadan olmasının 95-ci illik yubileyinə həsr olunmuş peşəkar boks turniri keçirilib.



APA-nın xəbərinə görə, turnir Azərbaycan Respublikası Diasporla iş üzrə Dövlət Komitəsinin dəstəyi ilə keçirilir.



Turnirin təntənəli açılış mərasimində şəhər meriyasının rəhbəri, Almaniya ictimaiyyətinin, Azərbaycan diasporunun nümayəndələri iştirak ediblər. Çempionata Almaniya və Azərbaycan himlərinin səsləndirilməsi ilə start verilib. Turniri 2000 yaxın tamaşaçının canlı izləyib.



Qeyd edək ki, Heydər Əliyev adına Dünya Boks Komitəsi 2012-ci ildə Almaniyanın Maqdeburq şəhərində soydaşımız Yaşar Niftəliyev Millinits tərəfindən yaradılıb. Komitənin məqsədi dünyada yaşayan azərbaycanlı idmançıları bir araya gətirmək, ulu öndər Heydər Əliyevin idmanla bağlı tövsiyələrini yerinə yetirmək, başqa millətlərdən olan idmançılarla Avropada yaşayan azərbaycanlı idmançılar arasında dostluq əlaqələrini möhkəmləndirmək, ümummilli liderin adını daşıyan kəmərləri dünyanın ən məşhur kəmərləri sırasına çıxarmaqdır.



Artıq Almaniyada ənənə halını almış boks turnirində müxtəlif ölkələrin boksçuları peşəkar rinqdə öz güclərini sınayıb. Ukraynalı boksçu Oleksandr Qaraşenko, Almaniya boksçuları Tino Froehliş və Dominik Kosel, Polşa boksçusu Thomas Andreevski və digər ölkələrdən olan peşəkar boksçular Heydər Əliyevin adını daşıyan Dünya və beynəlxalq kəmərləri uğrunda mübarizə aparıblar. Turnirin qalibi ağır çəkidə alman boksçu Tino Fröhlich olub. O, ukraynalı boksçu Oleksandır Hareşenko üzərində qələbə qazanıb.



Orta ağır çəkidə isə almaniyalı boksçu Dominik Kosel ölkəmizi təmsil edən Fərşid Rostami üzərində qələbə qazanıb.



Qeyd edək ki, Almaniyada ümummilli lider Heydər Əliyevin adına keçirilən boks turniri artıq 11 ildir keçirilir.