Ermənistan silahlı qüvvələrinin əsgəri 32 yaşlı Samvel Sepkxanyan başından güllə yarası alıb.

Axar.az xəbər verir ki, bu barədə Ermənistan Müdafiə Nazirliyinin mətbuat katibi Artsrun Ovanisyan məlumat yayıb. O bildirib ki, əsgər Tavuş vilayətindı qarşı tərəfin atəşi nəticəsində yaralanıb.

O, hazırda S.Sepkxanyanın vəziyyətinin ağır-stabil olduğunu bildirib.

Qeyd edək ki, bu gün Dövlət Sərhəd Xidməti erməni silahlı qüvvələrinin sərhəd məntəqələrimizi atəşə tutduğu barədə məlumat yayıb. Məlumatda bildirilir ki, aprelin 29-30-da Qazax rayonu istiqamətində Ermənistanla dövlət sərhədində Dövlət Sərhəd Xidmətinin (DSX) sərhəd döyüş məntəqələri günün müxtəlif vaxtlarında Ermənistanın silahlı qüvvələrinin bölmələri tərəfindən bir neçə istiqamətdən iriçaplı silahlardan dəfələrlə intensiv atəşə tutulub.

Bölmələrimiz atəşə tutulduğu Ermənistan silahlı qüvvələrinin döyüş mövqeləri istiqamətində cavab atəşi açıb.