Şənbə günü İranda ümummilli etirazlar fonunda biri karate çempionu, digəri könüllü uşaq məşqçisi olan iki gəncin edam edilməsi bütün dünyada hiddətə səbəb olub.

Publika.az xəbər verir ki, Məhəmməd Mehdi Kərəmi və Seyid Məhəmməd Hüseyni şənbə günü səhər tezdən asılıblar.

İranın məhkəmə xəbər agentliyi "Mizan"ın verdiyi məlumata görə, onların ötən il rejim əleyhinə nümayişlərdə iştirak etdikləri və noyabrın 3-də Kərəcdə Bəsic yarımhərbi qruplaşmasının üzvü Seyid Ruhullah Əcəmianı öldürməkdə mühakimə olunduğu iddia edilib.

Qeyd edək ki, sentyabrın 16-da polis tərəfindən saxlanılan 22 yaşlı Məhsa Əmininin ölümündən sonra ölkəni bürümüş etirazlarla bağlı edam edilənlərin ümumi sayı 4-ə çatıb.