İsveçrə hökumətindən sığınacaq istəyən jurnalistin müraciətinə 3-4 aya cavab veriləcək; anası Rəfiqə İsayeva: “Başqa yolu da yoxdur...”
Tanınmış publisist, “Ayna-Zerkalo” qəzetinin şərhçisi Rauf Mirqədirovun İsveçrə hökumətindən sığınacaq istəməsi barədə xəbər vermişdik. Hazırda orada ailəsi ilə birlikdə qalan jurnalistin müraciətinə 3-4 ay ərzində cavab veriləcək.

Bu barədə “Yeni Müsavat”a noyabrın 5-də oğlu ilə danışan R.Mirqədirovun anası Rəfiqə İsayeva məlumat verdi: “Rauf barədə yalnız bildiyim xəbər sığınacaq istəməsi barədədir. Müraciətinə 3 və ya 4 aya cavab verilə bilər. Özü mənə dedi ki, bu müddət ərzində hər şey bilinəcək. Demək olar ki, hər gün onunla danışıram. Ailəsi də siyasi kimi həmin ölkəyə gedib. Açığı, mən istəmirdim ki, oğlum siyasi sığınacaq alsın. Amma başqa yolu da yoxdur. Çünki ailəsi elə sığınacaq alıb. Ona görə Raufa heç nə deyə bilmərəm. Hazırda öz ailəsi ilə qalır. Qaçqın düşərgəsində qalmır. Həftədə bir dəfə qeydiyyatdan keçir. Səhhətindən daim əziyyət çəkirdi. Xüsusilə, öskürəyi çox olurdu. Amma deyir ki, havanın babat olmasından nədir, orada öskürəyi azalıb. Deyə bilmərəm ki, səhhəti tam yaxşıdır. Üzərində olan şərti cəzanın götürülməsi ilə bağlı vəkillə müqavilə imzalayandan sonra müraciət edəcəyik”.

Xatırladaq ki, R.Mirqədirov dövlətə xəyanət ittihamı ilə 6 il azadlıqdan məhrum edilmişdi. R.Mirqədirov həbsdən öncə “Zerkalo” qəzetinin Türkiyədə xüsusi müxbiri olub. Orada yerli polis tərəfindən saxlanılıb və Azərbaycana göndərilib. Ancaq ailəsi orada qalıb. Beynəlxalq hüquq-müdafiə təşkilatlarının və İsveçrə hakimiyyətinin dəstəyi sayəsində onun xanımı və iki övladı bu ölkədə sığınacaq alıb. Bu ilin martında Bakı Apelyasiya Məhkəməsinin qərarı ilə onun barəsindəki cəza 5 illik şərti cəza ilə əvəzlənib. Üç ay öncə Azərbaycan hakimiyyəti R. Mirqədirova ailəsinə baş çəkməyə icazə verib.

Jurnalist öz qərarını ailəsi ilə birləşmək istəyi, hələ də azadlığı və səhhəti üçün təhlükənin qalması ilə izah edib. Belə ki, ona qarşı ittiham hələ aradan qaldırılmayıb.