Rusiya Federasiyası Prezidentinin mətbuat katibi Dmitri Peskov jurnalistlərin xahişi ilə sosial şəbəkələrdə və xarici mediada Vladimir Putinin guya dublyordan istifadə etməsi, həmçinin bu yaxınlarda infarkt keçirməsi ilə bağlı yazılara münasibət bildirib.

Cebhe.info xəbər verir ki, Kremlin rəsmi nümayəndəsi belə danışanları “daha bir ördək” adlandırıb və dövlət başçısının səhhətinin yaxşı olduğuna əmin edib.

Peskov həmçinin Vladimir Putinin dublyor olması ilə bağlı iddiaları da tamamilə təkzib edib. Rusiya Prezidentinin mətbuat katibi brifinqdə deyib:

“Onun dublyoru yoxdur”.

Kreml sözçüsü əlavə edib ki, bu cür çıxışlar təbəssümdən başqa heç nəyə səbəb olmur.

Yeri gəlmişkən, Rusiya Federasiyası Prezidentinin özü 2020-ci ildə TASS-a müsahibəsində bildirmişdi ki, 2000-ci illərin əvvəllərində dövlət başçısının təhlükəsizliyini təmin etmək üçün dublyorun cəlb edilməsi ideyası var idi, lakin ondan imtina edildi.