Bu gün paytaxtın Xəzər rayonu Şüvəlan qəsəbəsində xidmət zamanı qətlə yetirilən polis əməkdaşlarının adları açıqlanıb.

Bunlar aşağıdakılardır:

- Polis kapitanı Məmmədov Eldəniz

- Polis serejantı Ağayev Mahir

- Polis serejantı Heydərov Mirəli.

Daxili İşlər Nazirliyi və Baş Prokurorluğun birgə yaydığı məlumata görə, iyunun 24-də paytaxtın Xəzər rayonu Şüvəlan qəsəbəsində əvvəllər dəfələrlə məhkum olunmuş, hazırda axtarışda olan 1986-cı təvəllüdlü Allahverdiyev Rövşən Oqtay oğlu polis əməkdaşları tərəfindən saxlanılarkən silahlı müqavimət göstərib. O, polis əməkdaşlarına mane olmaq məqsədilə ailə üzvlərini önə verərək yayınmağa və cavab tədbirlərinin qarşısını almağa cəhd edib, yaranmış vəziyyətdən istifadə edərək “Lancaster” markalı ov silahından atəş açaraq 3 nəfər polis əməkdaşını və 1 nəfər mülki vətəndaşı qətlə yetirib.

Davam etdirilən tədbirlərlə R.Allahverdiyev polis əməkdaşları tərəfindən zərərsizləşdirilib.

Faktla bağlı cinayət işi başlanılıb, istintaq hərəkətləri davam etdirilir.