Xəbər verildiyi kimi, bu gün səhər saatlarında Ukrayna Krım körpüsündə partlayış təşkil edib. SBU hücumun sualtı formada həyata keçirildiyini və partlayıcının gücünün 1100 kiloqram trotil ekvivalentində olduğunu bildirib. Həmçinin qeyd edib ki, nəticədə körpünün sualtı dayaqları zədələnib və hazırda körpü qəza vəziyyətindədir.

TEREF xəbər verir ki, Rusiya Müdafiə Nazirliyinə yaxın olan “Rybar” Telegram kanalının iddiasına görə, Ukrayna Silahlı Qüvvələri körpünü sualtı aparatla vurub: “Düşmən resursları guya “körpünün minalanmasından” danışsa da, əslində onların “Mariçka” və ya “Toloka” kimi aparatlardan istifadə etmələri ehtimalı yüksəkdir. Ya da əvvəllər geniş şəkildə elan olunmayan digər növ sualtı aparatlardan istifadə olunub”.

“Globalistics” kanalı da minalanma versiyasını inkar edir: “Orada heç bir minalanma olmayıb. 1100 kq trotil ekvivalentində partlayış çox güclü partlayış olardı və körpü buna tab gətirə bilməzdi”.

“Z-kanalları” həmçinin bildirir ki, körpü zərbə nəticəsində zədələnməyib və partlayışın gücü qoruyucu maneələrə dəyib.

Rusiya hakimiyyəti hələ ki, vəziyyətlə bağlı şərh verməyib.

AzPolitika