Gecə saatlarında Rusiya Ukraynanı yenidən çoxsaylı raket və dronlarla bombalayıb. Həftəsonu Ukraynanın Rusiyanın strateji əhəmiyyətli bombardmançı donanmasına qarşı həyata keçirdiyi genişmiqyaslı hücumdan sonra Kreml indi tam gücü ilə cavab verir.
Xəbər portalı “The Kyiv Independent”in məlumatına görə, Rusiya hücumları bir neçə regiona, o cümlədən paytaxt Kiyev və Ukraynanın ən qərbindəki şəhərlərə yönəlib. Dronlar bir neçə dalğa şəklində hücum edib. Hava hücumundan müdafiə qüvvələri fəaliyyət göstərir. Bütün ölkə üzrə hava həyəcanı verilib.
Bombardıman nəticəsində indiyədək dörd nəfər həyatını itirib. Onlardan üçü ağır hücumlar zamanı başqalarına kömək etməyə çalışan xilasedicilərdir.
Ukrayna Hərbi Hava Qüvvələri xəbərdarlıq edib: Rusiya bombardmançı təyyarələri havaya qalxıb – artıq qanadlı raketlərin buraxılması ehtimalı var.
Kiyevdə raket zərbələrindən sonra yaşayış binalarında yanğınlar baş verib, mülki infrastrukturun digər hissələri də alov içindədir. Bir dron çoxmərtəbəli binanın üst qatlarına düşüb. Kiyev meri Vitali Kliçko bildirib: “Paytaxtda artıq dörd nəfər həyatını itirib. Bir neçə məkanda axtarış-xilasetmə işləri aparılır. (…) Həkimlərin son məlumatına görə, indiyə qədər 20 nəfər yaralanıb. Onlardan 16-sı xəstəxanaya yerləşdirilib.”
Sarvan Səmədoğlu
TEREF