Dünya kinosunun ulduzu Anuk Eme 92 yaşında dünyadan köçdü. Dünya mətbuatı onun haqqında yazır.
2 il 1 gün öncə çəkildiyi ən məşhur filmlərdən birində tərəfi-müqabili Jan-Lui Trentinyanın ölümü haqqında yazmışdım, “Bir kişi və bir qadın” filmi haqqında da, o parçanı burada gətirirəm.
Eme dünya çaplı aktrisadır, məsələn,"Bir kişi və bir qadın”dan başqa Federiko Fellininin 2 ən güclü filmində çəkilib, zəngin filmoqrafiası, nüfuzlu rejissör adları...
Anuk Eme çox məşhur filmə çəkilsə də, mənimçün 1966-da çəkilmiş “Bir kişi və bir qadın” filminin baş qəhrəmanı olaraq qalır. Bütün dünyada və SSRİ-də məşhur, kino tarixində parlaq iz qoyan bu kinoya uzaq 1970 ya 71-ci ildə baxmışam, tələbə idim.
Film Bakı kinoteatrlarında göstərilmədi, hesab olunurdu ki, filmdəki məhəbbət-seks səhnələrinə baxmaq sovet vətəndaşına yaraşmaz. İndiki baxımdan yataq epizodlarında elə bir açıq-saçıqlıq da yoxdur, cavanlar gülər - burada nə var ki, qadağan da edirdilər?
Nüfuzlu ingilis Empire kinojurnalı Anuk Emeni kino tarixinin 100 ən seksi ulduz listəsinə salıb. Amma filmin gözəlliyi, cazibəsi Anuk Emenin seksuallığında, gözəlliyində, yataq-məhəbbət səhnələrində, ya görmədiyimiz maşınlarda, ya Trentinyanın dəli kimi maşın sürmək epizodlarında deyil. Bu film azsaylı sovet məhəbbət filmlərindən fərqli olaraq,- çoxusu 1941-45 müharibəsinə, kolxoz quruculuğuna ya istehsalata həsrolunmuşdu, - başqa, azad dünyanın azad insanlarının azad məhəbbətini göstərirdi. Gözəl göstərirdi, baş aktyorlar, rejissör, filmin bəstəkarı - hamısı ulduz idi ya ulduz oldu...
Frənsis Ləyin bəstələdiyi musiqi indi də hit-kinomelodilər listəsində qalır. Şərhdə yerləşdirəcəm.
Film cavan rejissor olan Klod Lelüşü Avropa və dünya ulduzu elədi.
Gözəl, solmaz, köhnəlməz bir Love Story - məhəbbət əhvalatı, əfsanəsi görmək istəyirsinizsə, “Bir kişi və bir qadına” baxın...
Çingiz Sultansoy
TEREF