Xəbər verildiyi kimi, “Aztelekom” MMC-nin baş direktoru Məhəmməd Məmmədov un barəsində həbs qətimkan tədbiri seçilib.

Musavat.com-a daxil olan məlumata görə, “MTN işi” çərçivəsində aparılan əməliyyatlarla bağlı Məhəmməd Məmmədovun müavinləri Zahir Vəliyev və Mehman Həsənov da hüquq- mühafizə orqanları tərəfindən sorğu-sual edilib. Zahir Vəliyev eyni zamanda qurumun texniki direktorudur. Onların da fəaliyyətləri araşdırılır. Əldə etdiyimiz məlumata görə, bu şəxslərin də həbs olunması gözlənilir.

Qeyd edək ki, APA-nın əldə etdiyi məlumata görə, M. Məmmədov barəsində dünən axşam saatlarında Səbayel rayon Məhkəməsinin qərarı ilə 3 ay müddətinə həbs qətimkan tədbiri seçilib.

M. Məmmədov Cinayət Məcəlləsinin 179.3.2 (külli miqdarda mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham olunur.