Ziya Məmmədov yenə önə çıxdı

Bakıda 15-ci Yubiley Xəzər Beynəlxalq “Nəqliyyat, Tranzit və Logistika” sərgisi işə başlayır. Nəqliyyat Nazirliyi tərəfindən dəstək göstərilən builki sərgidə nəqliyyat sənayesinin naliyyətləri, eləcə də yerli və xarici şirkətlərin ən yaxşı texnologiya və avadanlıqları təqdim olunacaq.

Tədbirlə bağlı redaksiyamıza maraqlı məlumatlar daxil olub. Bildirilir ki, nəqliyyat naziri Ziya Məmmədovun ölkə başçısı Ilham Əliyevlə görüşünün əhəmiyyətli hissəsi bu məsələyə həsr olunub. Görünür, Ziya Məmmədov sərginin keçirilməsi üçün ölkə başçısının razılığını alıb. Bildirilir ki, nəqliyyat sahəsinə aid bütün qurumlara həmin tədbirdə iştirak etmək tapşırılıb. Lakin maraqlıdır ki, “Azərbaycan Dəmir Yolları” QSC-nin sədri Cavid Qurbanov, “Azal”ın prezidenti Cahangir Əsgərov və “Azəryolservis” ASC-nin sədri Saleh Məmmədov tədbirdə görünməyib. Bildirilir ki, onların tədbirə qatılmaması Ziya Məmmədovla bağlıdır.


Tədbirin açılışını nəqliyyat naziri edib. Bu isə adıçəkilən şəxslərə xoş gəlməyib. Ziya Məmmədovun önə çıxması hakimiyyət daxilində də ciddi müzakirələrə səbəb olub. Bir maraqlı məqamı da qeyd edək ki, hakimiyyətin nəzarətində olan media orqanlarının əhəmiyyətli hissəsi tədbirlə bağlı heç bir məlumat verməyib.