Xəbər verdiyimiz kimi, tanınmış ictimai fəal, keçmiş siyasi məhbus İlkin Rüstəmzadə “Exspress bank”ın qanunsuz münasibəti ilə üzləşməsi barədə öz sosial şəbəkə hesabında məlumat yayıb.

İctimai fəal mövzu ilə bağlı sosial şəbəkə hesabında bunları qeyd edib: “Ekspress bank”a gəlmişəm. Cari hesab açmaq və debit kart almaq istəsəm də “uyğun” bilmədilər. Açıq-aşkar dedilər ki, sən “qara siyahı”dasan. Dedim ki, heç vaxt heç bir bankda kreditim olmayıb, hansısa şübhəli əməliyyatım olmayıb. Bildirdilər ki, məhkumluğa görə sən bizə uyğun müştəri deyilsən və səviyyən uyğun gəlmir bizim banka. Bankın bu elədiyi açıq-aşkar tərbiyəsizlikdir. Həm də cinayətdir. Diskriminasiyanın hər hansı növü və forması Azərbaycan Konsitusiyasına görə qadağandır. Mənə qarşı edilən bu ləyaqətsiz davranışla bağlı Maliyyə, Daxili İşlər Nazirliklərinə və Dövlət Təhlükəsizlik Xidmətinə rəsmi şikayət ünvanladım. Prezidentə də rəsmi şikayət ünvanlayacam. Sabah isə rəsmi qaydada məhkəməyə müraciət edəcəm. Bankdan mənə qarşı etdikləri davranışa görə 1 milyon manat təzminat tələb edəcəm”.

Gununsesi.info ictimai fəalın başına gələnlərin qanuni olub olmaması ilə bağlı tanınmış vəkil Əkrəm Həsənovun münasibətini öyrənib.

Vəkil bildirib ki, bu, qanun pozuntusudur və bank müştəriyə kredit verməyə bilər, bu, onun haqqıdır: “Səbəbin deməyə də bilər. Ancaq bank hesabı açmaq, pul köçürmək, əmanət qəbul etmək buna mülki qanunvericilikdə “publik aderta” deyilir. Yəni bank istənilən müştəriyə bu təklifi vermiş hesab olunur və hər bir müştəri gəlib orada istənilən əməliyyatları apara bilər. Bu, qanun pozuntusudur və müştərinin ixtiyarı var ki, həm Mərkəzi Banka, həm İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə, həm də məhkəməyə şikayət etsin. Müştərinin tam səlahiyyəti çatır ki, vurulmuş zərərə görə kompensasiya istəsin”.