“Gömrük Komitəsi bizi ölkəyə idxal olunan findığı baha qiymətə rəsmləşdirməyi tələb edir”. Bu sözlər bir nüsxəsi də DİA.AZ-a daxil olan şikayət məktubunda deyilir.

Narazı sahibkarlar adından ünvanlanan müraciətin müəllifləri prezident İlham Əliyevə Dövlət Gömrük Komitəsi rəhbərliyindən və xüsusən də DGK sədrinin müavini Səfər Mehdiyevdən şikayət edirlər.

Onların dia.az-a daxil olan müraciətində deyilir ki, Səfər Mehdiyev şəxsən sahibkarlara racon kəsir və bununla yetinmir:

Səfər Mehdiyevdən prezidentə şikayət

"Bu gün ölkədəki bahalığın səbəbi hər kəsi düşündürür, narahat edir. Amma kimsə burada gömrük işçilərinin, xüsusən də, Səfər Mehdiyevin fəaliyyətinin birbaşa rol oynadığını araşdırmaq istəmir. Biz dia.az vasitəsilə ölkə rəhbərliyindən xahiş edirik: Bizi gömrükdə rəsmən əzirlər, Səfər Mehdiyev elə qiymətlər təklif edir ki, əslində bu qiymətlərlə kimsə ticarət etməz. Biz məcburuq. Sonunda isə itirən vətəndaşlar və Azərbaycan dövləti olur".

Narazı sahibkarlar onu da əlavə edirlər ki, hələlik adlarını gizli saxlayırlar: "Bunu hər kəs başa düşər. Hələ də Səfər Mehdiyev vəzifə başındadır, biz də onunla muhattab olmaq zorundayıq. O isə kinli bir adamdır və bizə zərər vura bilməməsi üçün kimliyimizi açıqlamırıq. Amma sabah bu adam barəsində dövlət hərəkətə keçərsə, məhkəmə qurularsa, əlimizdə olan faktları da təqdim edəcəyik, açığa da çıxacağıq".

Əlavə bilgilərimiz olacaq. Qarşı tərəfi də dia.az olaraq dinləməyə hazırıq...