“Son günlər “5-ci kolon”un üzvləri Azərbaycan xalqına aşılamaq istəyirlər ki, dövlət deyilik, həyatımız yalnız Rusiyadan asılıdır və Qarabağı da ancaq Rusiyaya görə işğaldan azad etmişik. Rusiyanın bölgədə fövqəldövlət olduğunu mən də bilirəm və bu barədə dəfələrlə yazıb işlətdiyimiz ifadələrdə ehtiyatlı olmağa çağırmışam. Azərbaycan dövləti, xalqı və hakimiyyəti bütün dövlətlərlə, o cümlədən qonşu Rusiya ilə bərabər hüquqlu, xoş qonşu münasibətlərində olmaq istəyir. Vətən müharibəsində qələbə çalmağımızın isə Rusiyaya heç bir aidiyyatı yoxdur”.

Pravda.az-ın xəbərinə görə, bunu hüquqşünas Aslan İsmayılov bildirib.

“Rusiya Qarabağ uğrunda gedən döyüşlərdə açıq-aşkar erməni tərəfində olmadı, ancaq bizə də heç nə ilə kömək etmədi. Əksinə, gizlində bacardığı qədər bizə mane oldu. Rusiyanın bu müharibədə tərəf olmamağı da bizə olan sevgidən irəli gəlmədi. Sadəcə, Rusiya gözləntilərində yanıldı. O, hesab edirdi ki,

- Müharibə uzun sürəcək və ilk günlərdən kütləvi insan tələfatı olacaq, qış mövsümü və sonrakı vaxtlarda istədiyi kimi hərəkət edəcək;

- elə müharibənin ilk günlərindən əvvəlki vaxtlarda olduğu kimi Azərbaycanda hərc-mərclik yaranacaq və arzuladığı vaxt ölkəni qarışdırıb Azərbaycan hakimiyyətinə istədiyini diqtə edə biləcək;

- müharibə müddəti ərzində ən azından Ermənistanda hakimiyyət dəyişikliyi edib, öz qullarını hakimiyyətə gətirib sonra aktiv şəkildə ermənilərin tərəfində müharibəyə qoşulacaq.

Vətən müharibəsinin seçilmə vaxtı, dünya güclərinin davranışının hakimiyyət tərəfindən dəqiq hesablanması, Ordumuzun Vətən Müharibəsində heç kimin gözləmədiyi döyüş taktikaları, gedişlərindən istifadə etməsi, ordumuzun ildırım sürəti ilə irəliləməsi, 44 günə işğal edilmiş ərazilərimizin əksər hissəsini azad etməsi, əsgər və zabitlərimizin heç kimin gözləmədikləri qəhrəmanlıqları, orduya vahid rəhbərlik Rusiyanın bütün planlarını alt-üst etdi. Şuşa azad edilən kimi artıq Ermənistanda yerləşən rus qoşunları açıq şəkildə sərhədlərimizə doğru irəlilədi, Bakıya “İsgəndər”lər atıldı, rus vertolyotu özləri tərəfindən vuruldu və Xankəndini azad etməyə az qalmış daha böyük müharibədən qaçmaq üçün sülh sazişi imzalandı. Əminəm ki, vaxt gələcək bütün olanlar elan ediləndən sonra bu gün Vətən Müharibəsindəki şanlı qələbəmizə ağız büzənlər çox peşman olacaqlar. Ona görə də biz özümüzə inanmalı və müstəqilliyimizin ancaq bizdən asılı, bu dövrün çox mürəkkəb, təhlükəli olduğunu bilməli və “5-ci kolon” ünsürlərinin dediklərinə layiqli cavablarını verməliyik” – A.İsmayılov qeyd edib.