“Bu gün xalqımızın başı dikdir. Çünki torpaqlarımız azad olunub. Biz övladlarımızı itirsək də şərəfli ad qazandıq”.

Report xəbər verir ki, bunu Azərbaycanın Milli Qəhrəmanı, şəhid general-mayor Polad Həşimovun anası Səmayə Həşimova deyib.

S.Həşimova fəxr edir ki, Azərbaycanın Polad Həşimov kimi generalı olub: “Fəxr edirəm ki, belə bir oğul böyütmüşəm. Ata-anasının başını dik edən oğullar sağ olsun”.

Milli Qəhrəmanın anası onu da qeyd edib ki, bu gün Xankəndidə Azərbaycan bayrağı ucaldılıb: “Bayraqları ucaldan oğulların yeri behişt olsun! Allah şəhidlərimizə rəhmət eləsin! Bu gün qalib dövlət və qalib xalqıq. Biz övladlarımızı itirsək də şərəfli ad qazandıq. Xalqımız, Vətənimiz sağ olsun!”

Qeyd edək ki, bu gün Azərbaycanın Milli Qəhrəmanı, şəhid general-mayor Polad Həşimovun doğum günüdür. P.Həşimov 1975-ci ilin yanvarın 2-də Qəbələ rayonunun Vəndam kəndində anadan olub. General-mayor P.Həşimov 2020-ci il iyulun 14-də Tovuz istiqamətində baş verən şiddətli döyüşlər zamanı Ermənistan Silahlı Qüvvələrinin hücum cəhdinin qarşısını alarkən qəhrəmancasına şəhidlik zirvəsinə yüksəlib.