Xəbər verdiyimiz kimi, İraqda may ayında baş tutacaq ümumi və yerli seçkilərdə bütün türkmanları İraq Türkmanları Cəbhəsi təmsil edəcək.

Axar.az Milliyyətçi Türkman Hərəkatı, Türkmaneli, Türkman Qərar, İslami Türkman Vəfa Hərəkatı və İraq Türkman İslami partiyalarını özündə birləşdirəcək İraq Türkmanları Cəbhəsinin lideri Ərşad Salehi ilə müsahibəni təqdim edir:

– İraqda illərdir sürən müharibə sizə necə təsir göstərdi? Müharibədən əvvəlki və müharibədən sonrakı həyatınızda hansı dəyişikliklər oldu?

– İraqda yaşanan müharibələrdən ən çox təsirlənən İraq türkmanları oldu. Səddam Hüseynin dönəmində yüzlərlə insanımız qətlə yetirildi, həbs olundu. Amma bir millətin özünü yaşatması üçün qanı tökülməlidir. 1959-cu ildə də Kərkükdə böyük bir qətliam yaşandı, 1924-cü ildə ermənilər tərəfindən qətliam baş tutdu. Amma biz qanımız töküldükcə böyüdük. Xüsusilə, 2003-cü ildən, İraqda yeni dönəm başladıqdan sonra məzhəbçi layihələrin önündə türkmanlar durdu, ona müqavimət göstərdi. 2014-cü ildə İŞİD hücum etdiyi zaman yenə də ən çox türkmanlara zərər dəydi. Bütün bunlardan sonra biz yenidən İraq türkmanları olaraq öz gücümüzü birləşdirmək, öz mənliyimizi, kimliyimizi qoruyub saxlamaq mübarizəsi verməkdəyik.

– Hazırda İraqda baş verən proseslərə münasibətiniz necədir? İraqın gələcəyini necə görürsünüz?

– İraqın gələcəyində bundan öncə kürdlərin separatçılığı gündəmdə idi. Sözügedən separatçılıq bölgənin təhlükəsizliyinə böyük təhdid idi. Referendum mövzusunda biz türkmanlar olaraq birmənalı şəkildə ona qarşı durduq və birlik nümayiş etdirdik. Burda İraq bölünərsə, ən çox zərəri biz çəkərik. Buna görə də İraqın ərazi bütövlüyünü qorumaq ən çox bizim öhdəmizə düşür. Bəzən buna görə bizi tənqid edənlər də oldu. “Kraldan çox kralçılıq edirsiniz” dedilər. Bəli, bu xüsusda haqlıyıq. Çünki torpağımızın üzərində yeni bir Qarabağ yaradılmaması üçün biz də onlara müqavimət göstərməliyik. Buna görə də İraqın, Suriyanın, Yaxın Şərqdəki bütün dövlətlərin gələcəyi Kərkükdən başlayır. Kərkük hardadırsa, o ərazini dəyişdirə və onu bir türk ərazisinə çevirə bilər. İraqın gələcəyi təhlükədə olarsa, məzhəb savaşları davam edərsə, İraq da, Suriya da parçalanarsa, bunu həm də bölgədəki İran və Türkiyə hiss edər.

– May ayında baş tutacaq seçkilər ölkədə legitim hakimiyyət yaradacaq. Bu hakimiyyətin ilkin vəzifələri nələrdir?

– Biz bu seçkilərdə Türkman Cəbhəsi olaraq dövlətin daxilində yer almaq məqsədini önümüzə qoymuşuq. Yəni sadəcə olaraq millət vəkilləri sayı ilə deyil, biz hökumətin içində nazir vəzifələrinə nail olmaq istəyirik. Siyasi mexanizmin içində olmaqdıqca biz millətimizi qorumaqda çətinlik çəkə bilərik. Ona görə də planımız hökumətin içində yer almaqdır, sadəcə parlamentdə deyil.

– Başda Azərbaycan olmaqla, türk dünyası sizə necə yardımçı ola bilər?

– Bizim müştərək bir mədəniyyətimiz var ki, bu, hər ikimizə aiddir. Azərbaycan hökumətindən biz yardım istəməkdəyik. Mədəniyyət çərçivəsində festivallar, görüşlər, yığıncaqlar kimi fəaliyyətlərin Kərkükdə də, türkman bölgələrində də təşkilini istəyirik. Azərbaycandan hər hansı siyasi bir yardım istəmirik. Çünki ordakı vəziyyəti də dərk edirik. Cənab Prezident İlham Əliyevin də türk varlığını sevən bir insan olduğunu bilirik.

– Bir az da özünüzdən danışaq. İraqdakı həyatınız necə gedir? Nə işlə məşğulsunuz? Yaxın gələcəklə bağlı hansı planlarınız var?

– Kərkükdəki türkmanların acı çəkməklərinə, Səddam Hüseynin hakimiyyəti illərində həbsdə qalmağımıza, qardaşlarımızın edam edilməsinə rəğmən, bu müqavimətə davam etdik, çünki biz bu mübarizənin insanlarıyıq. İşimiz-gücümüz budur. Siyasətdən başqa heç bir işlə məşğul deyilik. Bu siyasəti də ən yaxşı şəkildə yürüdə bilmək üçün hər kəsin köməyinə ehtiyacımız var. Xüsusilə də öz qanımızdan olan qardaşlarımız bizə yardımlarını əsirgəməsinlər. Biz türk dünyasının bir parçasıyıq. Türk dünyasını təkamül etdirən, birləşdirən burdakı İraq və Suriya türkmanlarıdır. Həyatımızın dadı millətimizin səadəti ilədir.