Apardığım uğurlu seçki kampaniyası müxaliflərimin sayını artırır.

Axar.az xəbər verir ki, bu haqda millət vəkili Adil Əliyev öz Feysbuk hesabında yazıb. Deputat rəqiblərinin artmasından narahat olmadığını dilə gətirib:

“İndi də mənə qarşı keçmiş millət vəkili Hüseyn Abdullayevi danışdırıblar. Bu günlərdə məndən müsahibə götürən jurnalistlərdən birinin Hüseyn Abdullayevin vaxtilə millət vəkiliyindən uzaqlaşdırılması ilə əlaqəli sualına cavab olaraq həmin olayla bağlı öz düşüncələrimi bölüşmüşəm. İstəyən “Qaynar Qazan” layihəsinin ikinci hissəsində yayımlanan müsahibəmi bir daha nəzərdən keçirə bilər. Hüseyn Abdullayev guya özlüyündə mənə cavab verərək “nala-mıxa vurduğumu” deyib. Doğrusu, bu adda şəxsi unutmuşdum. Çünki çoxdandır xəbəri də gəlmir, yenə Azərbaycanda olanda mahnılar bəstələyirdi, adını ara-sıra kliplərdən eşidirdik, indi onu da yadırğayıb, yəqin Almaniyada “ilham pərisi” qeybə çəkilib. Hüseyn Abdullayev, mən sizin təbirinizcə desək, “nala-mıxa vurmuram”. Sizdən fərqli olaraq bir yerə vururam. Bəli, mən prezidentimiz İlham Əliyevin siyasi kursunu dəstəkləyirəm və bu kursa da sadiqəm. Mən başqaları kimi dünən hakimiyyəti, bu gün müxalifəti dəstəkləyənlərdən deyiləm. 180 dərəcə dönüklük əqidəli insanların işi deyil. Hakimiyyəti bəyənməyən mübarizəsini vətənində aparar. Uzaq Avropada məskən salıb, ona-buna mesaj göndərməkdən mənasız iş yoxdur, bəlkə də heç başqa işi də yoxdur”.