Amerika Birləşmiş Ştatları (ABŞ) hərbi-dəniz qüvvələrinə (HDQ) məxsus «USS Fort McHenry» desant gəmisi Dardanel boğazından keçməklə, Qara dənizə daxil olub.

ABŞ Altıncı donanması mətbuat xidməti xəbər verib ki, gəmi Neapoldakı bazadan çıxaraq, 22-ci dəniz ekspedisiya qrupunun tərkibində şimal istiqamətində hərəkət edir.

Altıncı donanmanın komandanı vitse-admiral Liza Franketti bəyan edib ki, gəminin göndərilməsi bölgədə təhlükəsizliyin təmin olunması məsələsində ABŞ-ın qərarlı olduğunu nümayiş etdirir.

«Gəminin göndərilməsi Qara dənizdə təhlükəsizliyin təminatı məsələsində bizim kollektiv qərarlılığımızı təsdiq edir və bizim NATO üzrə müttəfiqlərimiz və bölgədəki həmkarlarımız arasında sıx münasibətlərin göstəricisidir» – xəbərdə belə deyilir.

Kerç boğazında Ukrayna gəmilərinin Rusiya tərəfindən saxlanmasından sonra, ABŞ Qara dənizdə öz iştirakının artırılması barədə ciddi düşünür.
azpolitika