Ukrayna kənardan idarə olunur. Konkret desək, Rusiyaya qarşı müharibə yalnız kollektiv Qərbə lazımdır. Əgər belə davam etsə, müharibə qaçılmaz olacaq.

Bu barədə Axar.az-a eksklüziv açıqlamasında Ukraynanın deputatı Yevgeni Şevçenko bildirib.

Onun sözlərinə görə, Kiyev yaranmış vəziyyətdə Minsk razılaşmasını yerinə yetirməlidir.

“İndi Ukraynaya Rusiya və Belarusla yeni ittifaq müqaviləsi hava və su kimi lazımdır. Məhz bundan sonra bizim normal həyatımızı bərpa etmək şansımız olacaq. Bir vacib məqamı anlamaq lazımdır - Ukrayna özü-özlüyündə Rusiya üçün heç bir təhlükə mənbəyi ola bilməz. Amma xarici nəzarət mexanizmi əməlli-başlı təhlükədir. Ukraynada hakimiyyətə qardaş Rusiya ilə müharibə istəməyən insanlar gəlməlidir. Çünki Ukrayna ilə Rusiya arasında müharibə cəfəngiyatdır! Bu, yalnız Qərb üçün son dərəcə sərfəlidir. Təbii ki, Ukraynada rusofobiya ideasını qanında daşıyan insanlar da var. Lakin onlar azlıq təşkil edir. Ən pisi isə odur ki, hazırki vəziyyətdə bu azlıq çoxluğu idarə edir.

Bu gün biz hamımız başa düşməliyik ki, Rusiya Ukraynasız fövqəldövlət ola bilməz. Necə ki, Ukrayna da Rusiyasız normal həyata dönə bilməyəvək. Ukraynalıların bütün bəlalarının səbəbi son illər dövlətin düzgün olmayan geosiyasətidir”, - deyə müsahibimiz bildirib.