ABŞ və NATO-nun Rusiyanın təhlükəsizlik zəmanətləri ilə bağlı təkliflərinə verdiyi cavablar Rusiyanın heç bir fundamental narahatlıqlarını nəzərə almayıb.

Ovqat.com-un məlumatına görə, Rusiya prezidenti Vladimir Putin fransalı həmkarı Emmanuel Makronla söhbətində belə deyib.

O qeyd edib ki, Rusiya tərəfi alınan cavabları diqqətlə öyrənəcək və bundan sonra gələcək addımlar barədə qərar verəcək.

“Eyni zamanda, Prezident Putin bildirib ki, Amerika və NATO-nun cavablarında Rusiyanın NATO-nun genişlənməsinin qarşısını almaq, Rusiya sərhədləri yaxınlığında zərbə silah sistemlərini yerləşdirməkdən imtina etmək, eləcə də blokun hərbi qüvvələrini Rusiya-NATO-nun 1997-ci ildə imzalandıqları təsis aktında göstərilən Avropadakı potensial və fundamental mövqelərinə geri qaytarmaq kimi əsas narahatlıqlarını nəzərə almadığına diqqət çəkilib”, - Kremlin saytında deyilir.

Putin həmçinin qeyd edib ki, ABŞ və NATO-nun cavabı ATƏT və Rusiya-NATO-nun əsas sənədlərində təsbit olunmuş təhlükəsizliyin bölünməzliyi prinsipinə necə əməl etmək niyyətində olduqlarına dair əsas suala məhəl qoymayıb.