Corc Sorosun fondları artıq Aİ-də pul xərcləməyəcək.

Publika.az xəbər verir ki, Corc Soros Açıq Cəmiyyət Fondları (OSF) şəbəkəsi Aİ-dəki fəaliyyətini dayandırır. Bu barədə "Euronews" məlumat yayıb.

Məlumata görə, Avropa layihələri üçün donorların büdcəsi minimuma endiriləcək. Çünki təşkilat hesab edir ki, Brüssel və üzv ölkələrin özləri sosial problemlərin həllinə, demokratiyanın və vətəndaş qruplarının dəstəklənməsinə çoxlu pul xərcləyirlər.

Bildirilir ki, ötən cümə günü OSF idarə heyəti bütün cari benefisiarlara müvafiq məktub göndərib.

Macarıstan LGBT Assosiasiyasının nümayəndəsinin sözlərinə görə, bu qərarın səbəbləri çox az başa düşüləndir:

“Məncə, arqumentlər bir qədər ziddiyyətlidir. Avropa İttifaqı müxtəlif bəyanatlar verməyi sevir, lakin həyata keçirilməsi o qədər də sadə deyil. Soros hakimiyyətin hərəkətlərinə istinad edir, lakin Macarıstan hökuməti LGBT icması üçün çox az şey edir, əksinə, əslində bizə düşməndir. Demokratiyaya gəlincə, təkcə Macarıstanda deyil, digər Aİ-yə üzv dövlətlərdə də o, qaydasında deyil”.

Təşkilat yeni siyasətə keçidlə bağlı konkret müddət göstərməyib.